SUPERBALITA CEBU

Labella mokonsulta alang sa MGCQ

Cebu City Mayor Edgardo Labella. File photo

IPATAWAG ni Mayor Edgardo Labella ang lainlaing sector sa katilingban sa higayon nga magpadayon o mamintinar ang pagkunhod sa mga kaso sa coronavirus disease (Covid-19) sa Dakbayan sa Sugbo pag-abot sa Agusto 31.

Tuyo sa mayor nga kuhaan sa ilang panahom ang business community, security forces ug health expert kon irekomendar ba nga ipaubos ang Siyudad sa modified general community quarantine (MGCQ) o magpabilin sa general community quarantine (MGCQ) sugod Septiyembre 1.

Ang Department of Health (DOH) 7 niadtong Lunes, Agusto 17, niingon nga nagkaubos ang mga kaso sa Covid-19 sa dakbayan. Kini kwalipikado na nga ipaubos ang siyudad sa MGCQ.

Bisan si Inter Agency Task Force Deputy Chief Implementer retired Major General Melquiades Feliciano nisulti sa interbyu sa Sun.Star journalists nga andam na ang Siyudad sa Sugbo sa MGCQ kon basehan ang mga inadlaw nga gidaghanon sa infections. Matod ni Feliciano nga nag-average na lang og 20 ang matag adlaw nga dunay magpositibo, labing ubos pito niadtong Lunes.

Ubos kaayo kini kon itandi sa mga kaso niadtong tunga-tunga sa Hunyo ngadto sa tunga-tunga sa Hulyo diin tag 100 kapin ang makaplagang positibo sa Covid-19. Ang mao nga gidaghanon tumbas na sa National Capital Region (NCR).

Bisan ubos na ang mga kaso, giangkon ni Feliciano nga di siya morekomendar og MGCQ kay nagpanagana pa siya.

Apan iyang gipasalig nga naa na ang mga sistema alang sa pagsanta sa pagsaka sa mga kaso sa coronavirus. Ilang gibantayan og maayo ang mga kaso matag adlaw pinaagi sa Emergency Operation Center (EOC).

Salamat

Si Labella nagpasalamat ngadto sa kapin usa ka milyon ka mga tawo sa dakbayan kinsa nisunod sa mga minimum health protocol ug maoy usa sa hinungdan sa pagtibugsok sa kaso sa Covid sa nilabay nga tulo ka mga semana. Ang mayor mag-agad sa hiniusang desisyon sa stakeholders human unya sa panagtigom nga iyang ipatawag sa mosunod nga semana.

“Sulod niining duha ka semana, mopatawag ko og meeting sa business community, security forces aron atong matan-aw inig abot sa Agusto 31. Maminaw ta sa lainlaing sector pero usa sa akong gikabalak-an kon mag MGCQ ta, mohangyo lang ta nga duna gihapoy mga restrictions. Anyway, it is the local government unit who has the best position to look the actual situation surrounding any particular municipality, city and province,” padayag ni Labella.

Ang lokal nga kagamhanan dunay gahom sa paghangyo sa IATF kon unsa ang ilang gustong quarantine status, apan i-evaluate una kini sa task force nga maoy morekomendar ngadto kang Presidente Rodrigo Duterte.

Si Labella niingon nga kon mag MGCQ, duna gihapoy mga establisementong di tugtan nga makabukas./PAC

“Pananglit mag MGCQ na ta pero dili lang usa nato tugotan ang mga senihan nga moabli. Dili lang usa nato tugotan ang mass gathering sa contact sports. Siguro dili sad nato tugotan 100 percent ang atong public transport ug ang pagpahigayon og concert ug uban pa,” dugang sa mayor.

Ang mayor nipasabot nga di siya moinsister sa iyang kaugalingon nga desisyon kay sa iyang personal nga opinyon, gusto siya nga magpabilin sa GCQ.

“If it is inevitable after sa panagtagbo nato sa mga negusyante, health expert, security forces ug kon mao gyud ang mahukman nga mag MGCQ na ta, kinsa man ko nga mosupak if that is the collective decision of the stake holders,” batbat sa mayor.

Si Labella nagpasalamat usab ngadto sa mga barangay official, force multipliers, Philippine National Police, Armed Forces of the Philippines ug sa tanang frontliners nga ningtabang para maminosan ang epekto sa Covid-19 sa dakbayan sa Sugbo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph