Oro city isolation support staff nagposibito sa Covid-19

Cagayan de Oro City Health Office Epidemiologist Dr. Joselito Retuya. (Hulagway iya sa City Information Office)
Cagayan de Oro City Health Office Epidemiologist Dr. Joselito Retuya. (Hulagway iya sa City Information Office)

NAGPOSITIBO sa novel coronavirus (Covid-19) ang usa ka 58-anyos nga babae nga support staff sa city isolation unit sa Cagayan de Oro.

Matud ni City Health Office Epidemiologist Dr. Joselito Retuya, ang babae usa ka local Authorized Person Outside Residence (Apor) ug naay duha ka address sa Barangay Balulang ug Gusa.

Ang 58-anyos nga babaye mibiyahe sa Manila kaniadtong Marso ug mibalik sa Cagayan de Oro sa Hunyo, ingon ni Retuya. Natiwas niya ang iyang home quarantine sa wala pa siya nagsugod sa pagtrabaho ingon usa ka support staff sa city isolation unit sa Hulyo 1.

Niadtong Hulyo 9, gi-swab siya ingon usa ka kinahanglanon sa opisina ug sa Hulyo 11 ang resulta migawas nga negatibo.

Gi-swab usab siya Agosto 17 ayha siya i-deploy sa city hall, ug ang result migawas nga positibo sa Agosto 18.

Ang babaye asymptomatic ug wala’y comorbidity. Naa siya karon sa Temporary Treatment and Monitoring Facility.

Giila sa City Health Office ang walo ka mga household contacts sa babae ug ang duha nga workplace contacts. Silang tanan naa sa city isolation unit ug gikatakdang ibalhin sa Temporary Treatment and Monitoring Facility.

Matud ni Retuya, ang duha ka mga lugar nga gipuy-an sa babae, ang Barangay Balulang ug Gusa, dili ipailalum sa localized focused containment, apan usa ka intensive active surveillance ang himuon.

Dugang ni Retuya nga gikonsiderar nila ang posibilidad nga ang 58-anyos nga babae nataptan sa city isolation unit.

"That is what we are looking at. Despite that, ang ato gyapon is on the preventive side. Magpadayon kita pag paningkamot kung asa gyud ang possible na source," matud ni Retuya.

"In fact naa tay nakitaan pud nga mga positives sa atong mga CIUs nga migawas nga positibo paghuman sa atoang swabbing," dugang niini.

Giingon usab ni Retuya nga hangtod karon, ang mga staff sa city isolation unit nga gi-swab human sila nagpakita sa mga sintomas sa virus negatibo ang resulta gawas sa 58-anyos nga babae.

Ang 58-anyos nga babae usa sa mga 19 ka mga bag-ong kumpirmadong kaso sa Covid-19 sa Cagayan de Oro. Sa pagkakaron, ang kinatibuk-ang ihap sa mga kumpirmadong kaso sa dakbayan anaa na sa 229.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph