ANDAM ang MP Promotions ni boxing legend Manny Pacquiao nga mokuha sa ubang boksidor nga gikan sa ALA Boxing Gym ug motabang nga mabalik ang boxing career sa ALA Boys.
Matod ni Sean Gibbons, ang presidente sa promotional outfit nga gipanag-iya ni Senador ug eight-division world champion Pacquiao, iyang tan-awon kung unsa iyang mabuhat aron ma-revive ang boxing careers sa mga boksidor sa ALA Gym.
“I am going to see about helping a few,” matod ni Gibbons sa report sa Spin.Ph human mipagawas ang ALA Gym og opisyal nga pamahayag sa ilang paghunong sa operasyon sa ALA Gym ug ALA Promotions.
Matod ni Gibbons interesado siya sa ubang fighters sa ALA Boxing apan mibalibad kini sa paghatag og mga pangalan sa pagkakaron.
Ang pinakasikat nga boksidor nga gikan sa ALA Gym mao ang longest-reigning Filipino world champion nga si Donnie “Ahas” Nietes (42-1-5, 23 KOs). Ang lumad nga taga Murcia, Negros Occidental usa lang sa tulo ka Filipino fighters nga midaog og world title sa upat ka weight classes. Ang laing duha mao Pacquiao ug Nonito Donaire Jr.
Anaa pud sa ALA Gym sila Milan Melindo, world-rated Melvin Jerusalem, Albert Pagara, Jeo Santisima, KJ Cataraja ug Jonas Sultan.
Si Gibbons mituo nga aduna pay ikabuga si Nietes sa edad nga 38 anyos. Ang problema lang kay wala kini bakos nga gikuptan karon.
Si Nietes mao ang WBO super-flyweight champion sa wala pa niya buhii ang titulo niadtong sayong bahin sa 2019 aron kontrahon unta ang big names sa division sama nila Juan Francisco Estrada, Srisaket Sor Rungvisai, ug Roman “Chocolatito” Gonzales.
Ang MP Promotions adunay upat ka reigning Filipino world champions sa ilang stable nga sila Pacquiao (World Boxing Association welterweight), Jerwin Ancajas (International Boxing Federation super-flyweight), Johnriel Casimero (World Boxing Organization bantamweight) ug Pedro Taduran (IBF mini-flyweight).
Gibuhian na sa ALA Boxing ang ilang mga fighters human kini mo-anunsiyo nga manirado na tungod sa epekto sa pandemiya ug sa pagkasirado sa ilang longtime TV partner ang ABS-CBN.