Bomba gilubong sa yuta

Hulagway gikan sa Kamagong Battalion Facebook page
Hulagway gikan sa Kamagong Battalion Facebook page

DAVAO DE ORO -- Gisuta pa sa mga awtoridad kon kang kinsa ang nakaplagang improvised explosive device (IED) nga gilubong sa yuta didto sa Sitio Lusang, Barangay Napnapan, Pantukan sayo sa buntag niadtong Miyerkules, Agosto 19, 2020.

Subay sa report, usa ka impormante misumbong sa kasundalohan kabahin sa bomba nga nakit-ang gilubong sa nahisgutang dapit.

Gilayong giaksiyonan sa tropa sa 28th Infantry (Kamagong) Battalion ubos sa pamunoan ni Lieutenant Colonel Alexander D. Banatao ang dapit hinungdan sa pagkarekober sa IED nga dunay gibug-aton nga lima ka kilo.

Matud pa nga ang maong bomba gisulod sa sako ug gilubong ilawom sa yuta sa wa mailhing suspek.

Dugang gibutyag nga niadtong Agosto 1, usa sab ka bomba ang narekober sa mga sundalo sa Sitio Puting Sayaw sa samang barangay kon diin duna kini gibug-aton nga upat ka kilo.

Gikustodiya na sa 28th Infantry (Kamagong) Battalion ang bomba alang sa tukmang disposasyon.

Samtang mapasalamat sab si Banatao sa pakig-alayon sa mga impormante nga maoy nagsilbing susi sa pagkarekober sa maong bomba.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph