HOY! Ayaw’g hunahuna og laing kasinati-an kay di kana ang akong gustong ipasabot.
Ang buot nakong hisgutan mao ang pag-gamit sa app nga Zoom sa media conference sa Star Cinema alang sa proyektong ‘The Four Bad Boys & Me.’
Ikaduha na unta ni pero wa ko kasulod adtong unang giimbitar ko alang sa proyektong ‘Ang Sa ‘Yo Ay Akin’ kay grabe ang kamang (kon wa nay lain pang termino nga mas hinay pa sa internet.
Adtong Lunes, naka-apil na gyud ko pero dihang gitawag na ko sa moderator nga si Robi Domingo, nagkontrabida na sab ang internet (sige man ganing ‘meeting interrupted’ ug ‘trying to reconnect’).
Ang ending, wa gyud ko kasulod. Anà! Paet!
Ang ‘The Four Bad Boys & Me’ unang lovecast (love + podcast) nga madungog sa Spotify gawas nga makita sa official Facebook page sa Star Cinema ug sa YouTube kada Martes ug Huwebes sa 7:30 sa gabii ug karong Agosto 27 (Huwebes) na kini magsugod.
Atangi! Ang mga bida mao sila si Kaori Oinuma, Rhys Miguel, Jeremiah Lisbo, Mark Rivera ug Aljon Mendoza. Gisuportahan sila ni Chie Filomeno, Karina Bautista, Alora Sasam, Jenny Jamora, Stacy Chua ug Maymay Entrata isip DJ Zari sa ‘Listen To Love.’
Gikan kini sa Wattpad novel nga sinulat ni Tina Lata (Blue Maiden) ug gidirihir ni Joel Ferrer.
INITIATIVE TUNGOD SA COVID
Tinuod man o dili (pero mas maayo gyud kon tinuod), nalingaw ko sa mga gipakita sa pipila ka artista sa ilang mga gibuhat karong may pandemic.
Una si Eric Fructuoso nga nakit-ang nag-drive og tricycle.
Si Heart Evangelista, nga naila nga gikan sa sapiang pamilya ang nipakita sa mga sinina nga iyang napalit sa ukay-ukay. O di ba?
Si Tom Rodriguez, nipakita usab nga di lang siya maayong moarte gawas nga may kaambong sab siyang mahagpat (matud pa sa nipanaw na nga brodkaster nga si Charlotte Cinco), maayo sab siyang mo-rap.
Mosulat sab siyag mga rap ug mga kanta, gawas pa niini, maayo sab siyang modibuho (drawing).
Gani duna gyud siyay studio diin modawat siyag mga customer nga gustong magpadibuho ilang mga dagway.
Mao nay giingong iya-iya lang tag pangitag paagi nga makasugakod sa pagsulay nga gidala niining pandemya.
Ang uban natong kaigsoonan nalingaw ug nakasapi sab sa pagpananom, pagluto og mga sud-an, cakes, pastries ug uban pa, pagpamaligyag utanon, mga kinahanglanon kon magpa-party ug bisan unsa na lang.
Kini nagpamatuod lang sa saad sa Ginuo nga iyang tabangan ang tawo basta molihok lang kini.
Mao nga di lang gyud ta magpakawala sa paglaum.
PROTOCOL
Pero sa atong pagpanikaysikay, di ta angay malimot sa pagtuman sa pagsul-ob sa face mask ug face shield, pagpanghunaw sa kamot ug pag-obserbar sa social o physical distancing.
Sama sa akong giingon sa unahan, motabang gyud ang kahitas-an.