DRAYBER sa motorsiklo nga nga Yamaha N-Max namatay human nalatayan sa luyong ligid sa dump truck nga iyang buot unhan sa likoon nga dan sa Sityo Binliw 2, Barangay Binaliw nga usa ka bukirang dapit dakbayan sa Sugbo, Huwebes sa gabii, Agusto 19.
Wala mahitsura ang ulo sa drayber nga si Jeckson Ungay, 22, kinsa mokuha unta sa iyang higala sa sentro sa dakbayan.
Sumala ni PCpl. Dante Mahilum sa Talamban Police Station 7 sa Cebu City POlice Office (CCPO), ang drayber sa dump truck nga gipriso na karon mao si Jose Fernandez, 58 ug taga Barangay Basak, dakbayan sa Lapu-Lapu.
Sa imbestigasyon sa kapulisan sa Talamban, nisuway sa pag-overtake ni Ungay sa dump truck apan didto kini nibangga sa laing motorsilo nga nag-park sa wala nga bahin sa dalan nga apiki maoy hinungdan nga natumba ang gisakyan nga motorsiklo sa biktima ug naabtan sa luyong ligid sa trak sa luyo hinungdan nga maayong pagka pisat sa ulo niini.
Ang drayber nga si Fernandez mag-atubang og kaso sa Reckles Imprudence resulting to homicide and damage to property nga ipasaka sa kabanay sa biktima. (BBT)