MAGTIAYON, uban sa giingong mamalitay og shabu, nasikop sa usa ka buy-bust operation sa parking lot sa usa ka mall sa Barangay Hipodromo, Dakbayan sa Sugbo.
Sa lahi nga anti-drug operation sa kasikbit nga barangay, napatay ang usa ka gikatahapang drug pusher human giingong nisukol sa kapulisan.
Ang magtiayong Wilfredo, 40, ug Almera Flores, 41, taga Barangay Cotcot, lungsod sa Liloan, ingon man ang ilang kuyog nga si Rabe Allego, 28, taga Jugan, Consolacion, nakuhaan og siyam ka medium pack sa gituohang shabu nga motimbang og usa ka kilo nga dunay balor nga P6.8 milyunes.
Si Police Lieutenant Colonel Jovit Culaway, pangu sa PDEG, niingon nga duha ka mga semana nilang gipanid-an ang magtiayon sa ilang illegal drug operation.
Human nila nakompirmar ang operation sa magtiayong Flores, ilang gipahigayon ang buy-bust uban sa Philippine Drug Enforcement Agency (PDEA) 7, Regional Intelligence Unit (RIU) 7, Regional Drug Enforcement Unit (RDEU) 7 ug Mabolo Police Station.
Matod ni Culaway nga high value individual (HVI) ang magtiayong Flores. Gidala usab sa mga awtoridad ang awto sa mga Flores nga maoy ilang gisakyan atol sa buy-bust.
Si Allego nanghimakak nga kauban sila sa magtiayon ug wa siya makaila. Si Culaway niingon nga kauban si Allego sa magtiayon kay diha sud sa sakyanan. Matod niya nga mamalitay si Allego og shabu.
Samtang sa laing anti illegal drug operation sa laing team nga gikan sa samang mga unit apan gipangulohan sa PDEA 7 sa Cabantan St., Sityo Lubi, Barangay Luz, kasikbit sa Hipodromo, napatay ang gikatahapang drug pusher.
Matod ni PDEA 7 Regional Director Levi Ortiz nga high value target ang suspek nga giila nga si Rosio Juablar Jr.
Dugang ni Ortiz nga atol sa ronda, ilang naaktuhan si Rusio Juablar Jr. nga lantaran ang pagpamaligya og drugas ubos sa iyang balay.
Dihang niabot ang mga operatiban, nidagan si Juablar ug nisaka sa iyang pinuy-anan aron mokuha sa iyang armas.
Nahitabo ang ginukdanay tali kan Juablar ug mga anti drug agent. Giingon nga nakakuhag armas si Juablar, apan naunhan pagpusil.
Dali siyang gidala sa tambalanan, apan gideklarar nga dead on arrival. Nakuha gikan sa crime scene ang 50 gramos nga gituohang shabu nga dunay DDB value nga P340,000. (BBT)