PIRMADO na ni Cebu City Mayor Edgardo Labella ang memorandum of agreement tali sa lima ka shipping line nga maoy nitanyag pagpasakay sa mga locally stranded individuals (LSI) nga taga Dakbayan sa Sugbo, apan natanggong sa lainlaing lugar sa Pilipinas gumikan sa quarantine taliwa sa hulga sa coronavirus disease 2019 (Covid-19).
Ang lima ka shipping lines gilangkuban sa Starlite Shipping, Medallion Shipping, Cokaliong Shipping, Lite Shipping ug 2GO Shipping maoy inisyal nga niabaga sa gastohan pagpauli sa mga LSI pinaagi sa pag-isyu og ticket para sila makapauli.
Ang Cebu City Government maoy mo-refund sa kantidad sa ticket nga giisyu sa shipping lines. Kini ayuda sa City Government ngadto sa mga LSI nga taga Cebu City human usab giaprobahan sa City Council ang resolution nga nagtugot kang Labella pagpirma sa maong MOA niadtong tunga-tunga sa Hulyo.
2,000 MIABOT
Gipahibawo ni Konsehal Joel Garganera, deputy chief implementer sa Inter Agency Task Force-Cebu City, nga niabot na og 2,244 ka mga LSI ang nakapauli sa Cebu City gikan sa lainlaing isla sa Pilipinas.
Kini human gitugotan na nga makapauli ang mga LSI ug nakasakay nga libre gikan sa mga barko nga maoy gikatambayayong sa City Government.
Samtang 9,999 na ka mga LSI gikan sa Cebu City ang nakagawas gikan sa Cebu City paingon sa ilang tagsa-tagsa ka LGU human sa kapin upat ka buwan nga pag-istar dinhi sa dakbayan. (PAC)