ANG pagbunok sa uwan niadtong Miyerkules sa gabii, Agusto 19 hangtod sa Huwebes sa kaadlawon, Agusto 20, 2020 mimugna og landslide sa Dakbayan sa Sugbo ug baha sa Dakbayan sa Mandaue.
Di na makaagi ang mga sakyanan sa Barangay Agsungot, Dakbayan sa Sugbo, gumikan sa pagkahugno sa mga bato nga nitabon sa karsada taliwa sa grabeng bunok sa uwan.
Si Barangay Kapitan Pedro Dumaolao nagkanayon nga alas 11 sa gabii sa Miyerkules nidahili ang mga parte sa yuta nga nahimutang kapin sa usa ka kilometro gikan sa utlanan sa Barangay Binaliw ug Agsungot nga nakabara sa dagan sa mga sakyanan.
Way gika-report nga naangol o balay nga nadanyos.
Si Konsehal Jerry Guardo, chairman sa committee on infrastracture sa Cebu City Council maoy gitahasan ni Mayor Edgardo Labella sa pagsusi sa dapit.
Ang konsehal nakigtambayayong dayon sa Department of Engineering and Public Works para mapadad-an sa mga heavy equipment nga gikinahanglan aron mahakot ang dagkong mga bato.
Atol sa pagsuwat ning balita, nakuha na ang nahunlak nga mga bato, apan wa pa gihapon paagii ni Dumaolao subay usab sa rekomendasyon sa DEPW kay matag karon ug unya, adunay maligid nga bato.
Giasoy ni Guardo, kinsa nidala og representative gikan sa Mines and Geosciences Bureau (MGB) nga nakaapekto sa pagdahili ang linog niadtong Martes ug gisamotan sa grabeng pag-uwan.
Si Guardo nagkanayon nga para sa luwas nga pag-agi, kinahanglan una nga siraduan ang maong bahin sa karsada.
Di kini paagian hangtod nga di pa makuha ang mga bato nga nagpatong sa ibabaw ug nagkinahanglan kini og road widening.
Si Dumaolao, sa iyang bahin nagkanayon, nga kadtong moagi sa Agsungot nga nagpuyo sa Barangay Lusaran, Cambinocot ug Paril nga moadto sa City Proper ug vice versa, kinahanglan adto moagi sa Barangay Mabini ug Guba dulhog sa Barangay Pulangbato o sa Transcentral Highway.
GIBAHA
Tungod sa kusog nga uwan niadtong Agosto 19, nisuyla ang baha sa Butuanon River nga nakaapekto sa tulo ka mga sitio sa Barangay Paknaan, Mandaue City.
Gabii sa Miyerkules, gipabakwit ang mga residente gikan sa Sityo Sili, Sityo Kalubihan, ug Sityo Talong.
Si Felix Suico Jr., operations head sa City Disaster Risk Reduction Management Office, niingon nga kadaghanan sa mga nakabakwit gikan sa lugar mga bata.
Matod niya, nga gisiguro una sa mga ginikanan ang mga bata nga mabakwit sa barangay gym samtang sila nagpadayon sa pagbalhin sa importanteng mga gamit sa ilang balay ngadto sa mas luwas nga lugar.
Bisan kon aduna nay riprap ang Butuanon River nga nagpugong unta sa pag-awas sa sapa, apan tungod sa pagbunok sa uwan gikan hapon hangtod na sa kaadlawon, nisuyla ang sapa.
Niangkon si Suico nga galisod sila sa ilang pagresponde sa lugar tungod kay ang baha taga paa na ug sulog ang tubig hinungdan nga nagdala sila og heavy equipmen. Naghigot sila sa ilang hawak og lifeline rope aron di sila madala sa sulog.
Alas 10 sa gabii, gisugdan og pabakwit ang mga residente, apan sa tungang gabii namalik na ang mga residente sa ilang panimalay human nikutat ang baha.