HELLO everybody, ilabi na ang tigpanubay aning SuperB!
Naay Covid-19, krisis sa ekonomiya, pait gamay sa bulsa, kalaay ug pagkawalay gana apan gaginhawa pa. Hallelujah!!!! Thank You, Lord!!!
Sa napaminawan nakong ebanghelyo pinaagi sa Facebook live sa Davao Chinese Baptist Church ang atong hisgotanan karon. Ang pulong nga "gratitude" o "pagkamapasalamaton."
Gipresenta sa magwawali nga ang "gratitude" gisugdan sa mga letrang "GR" diin morag tingog sa nasuko as in "grrrrr" ug ang nahibilin kay "attitude" o "pamatasan" nato. Iyaha ra to nga ideya dili sa diksyonaryo.
Ang atong pamatasan, konektado sa atong oryentasyon, tendensiya, paagi, paggawi, pagbati, posisyon ug uban pa labi na sa atong kaisipan.
Example? Kanang abogado ka unya ang imong kaistorya klaro kaayo nga nagapangilad kanimo -- syempre... dili gayud ka magpatunto kay nasayod ka sa pamalaod.
Ang imong attitude ang mahimong tulay sa pagtratar nimo sa imong kaistorya. Pwedeng dili ra nimo siya tubayan agi'g respeto. Pwede pod imong ingnan sa kamatuoran sa kalmang pamaagi kung grasyoso ka nga tawo apan kung hambugero pod kang daku nga dili magpalupig -- istraykon dayon aron mahilum bahala maulawan ang imong kaistorya.
Klaro bah? Mao nay ingon nila nga kitang tanan, halos parehog ginaagian sa kinabuhi apan ang atong reaksyon managkalahi base sa atong kinaiya o pamatasan.
Sa kasamtangan, daghan gayud mga butang ang makapasuko kanato, right? Ang among daku na kaayo nga African Aloe Vera plant giibot ra sa silingan dala dagan. Mahalin na katog P500 buh.
Nagbarter pod ko sa akong dragon fruit sa silingan kay daw wala pa nila kini natilawan. Kaluoy sa kalangitan... sobra duha ka semana na wala pa nakumpleto ang garden soil nga giingon nila. Ihatod sa balay kuno -- gibaligya diay sa lain kay wala silay planong bayran ang ilang gikaon nga produkto.
Moreklamo unta ko sa purok ug sa barangay apan taas diay lista sa ilang ngalan didto. Naulaw na hinuon ko. He he.
Pwede ra god mangayo ay. Manghatag man gani ta sa wala nangayo -- kato pang na-igno? Bitaw, gamay ra kaayo kana nga butang nga mahimong rason nga dili kita makatutok diretso sa mata sa atong silingan.
Anyway, sa masuko... makaingon gayud og "grrrrrrr" apan morag dili "fair." Dili ba, "pildi kuno ang maglagot?" Uyon mo?
Sa mga hagit ug kalisdanan, we need to check our attitude o pamatasan kay basig kita gihapon ang malabdan.
Matod pa, "Let go and let God." Dili na nato dauton pag samot ang atong pagbati sa mga butang nga dili kaya sa atong mga power, okey. Chill lang aron gaan ang atong dughan.