Paglaom sa nasod ang kabataan maoy tugon nga gibilin sa nasodnong bayani Dr. Jose Rizal.
Kabataan maoy bililhong bahandi sa ginikanan busa kaakohan ang paghungit sa edukasyon kay ang kinaadman usa ka gahom.
Katungdanan sab sa gobyerno nga ang edukasyon makab-ot sa tanan pinasikad sa batakang balaod. Dughit sa edukasyon ang community colleges, libreng matrikula sa state universities, scholarship programs, ayuda sa Pantawid Pamilyang Pilipino Program hangtod ang bata mag-edad 18 anyos, non-formal education nga school-based ug community-based sa mga out-of-school subay sa Alternative Learning System (ALS) ingon man skills ug livelihood trainings sa Technical Education and Skills Development Authority (Tesda).
Nakadawat og pagsaway ang dugang duha ka tuig sa batakang edukasyon (K-12) kay gawas nga dili pa andam lain na sab nga palas-onon sa mga ginikanan. Hinanggaw kadtong pag-apod-apod og libreng condom ngadto sa mga tinun-an sa high school ug ang pagtudlo sa sex education.
Ipabalik ang Good Manners and Right Conduct (GMRC) sa Kindergarten-Grade 6, Values Education sa Grade 7-12, Phil. Military Training (PMT) sa Grade 9-10 ug Reserve Officer Training Core (ROTC) sa Grade 11-12 aron dili malimtan ang maayong pamatasan ug makasilsil sa disiplina, patriyotismo ug paghigugma sa nasod. Gani gibalik ang klasipikasyon sa ranggo sa kapolisan. Ang ROTC giwagtang ug gihulipan sa Citizens Army Training (CAT) panahon ni Pres. Gloria Arroyo sa 2002 nunot sa pagpatay sa tinun-an sa University of Santo Tomas (UST) nga mibutyag sa anomaliya sa ilang ROTC unit.
Isingit pagtudlo ang pinulongang binisaya, kasaysayan sa mga bayani, road safety, ill-effects of illegal drugs, disaster preparedness ug climate change. Lakang sa kongreso ang no-homework policy, limitahan ang bug-at nga aktibidades ug dili ihungit ang lisod nga subjects sa senior high school sanglit natataw sa mga pagtuon nga makamugna og mental illness.
Gumikan sa kuyaw nga pandemya himuon ang klase ubos sa modernong teknolohiya nga distance/blended learning pinaagi sa pag-imprinta sa modules, online internet, radyo ug telebisyon.
Lisod ipatuman ang internet kay daghang walay access ug nagkamang nga signal. Lisod sab sa radyo ug telebisyon sa hilit nga lugar nga nagsuga lang og lamparilya. Uban naanad sa face-to-face classes nga gidili pa karong panahona. Inay sugdan sa Agusto 24 giuswag sa Okt. 5 ang klase aron maplansa ang learning materials.
(csa_1156@yahoo.com / 09064648954)