Dugang mga bus modagan na sab sa northern Cebu

Subay niining hinay-hinay nga pagbalik sa publiko sa kadalanan, nagpuno usab ang Land Transportation Franchising and Regulatory Board (LTRFB) 7 og dugang 20 ka mga bus aron modagan sa amihanang bahin sa lalawigan sa Sugbo.

Si LTFRB 7 Regional Director Eduardo Montealto Jr. nagkanayon nga magsugod pagdagan ang 20 ka mga bus nga gikan pa sa Bacolod karong adlawa, Agusto 22.

Dugang ni Montealto nga niadtong Martes naabot ang maong mga unit diin gipakatap kini sa Ceres Bus.

Si Montealto nipasabot nga nakita na nila nga aduna’y kakuwang sa bus sa norte hinungdan nga midugang sila.

Sa pagkakaron anaa na sa 259 ka mga bus ang nanagan sa northern Cebu, lakip na niini ang dugang 20 ka unit.

Samtang anaa sa 339 ka units sa bus ang nanagan karon sa habagatang Sugbo.

Si Montealto nagkanayon nga ang sa norte, diha sa Parkmall sa Dakbayan sa Mandaue ra kini kutob ug motuyok kini sa lalawigan sa Sugbo sa norte nga bahin.

Wa na moadto sa Cebu North Bus Terminal ang mga bus kay gamiton na kini isip isolation center sa Dakbayan sa Mandaue.

PUJ NANAGAN

Subay usab niining pagbalik na sa mga traditional PUJ sa kadalanan sa lalawigan sa Sugbo, anaa na sa 77 ka traditional jeep ang nagdagan sa nagkadaiyang parte sa Sugbo.

Si Montealto nagkanayon nga sa modified general vommunity quarantine (MGCQ) areas ra pwede ang maong mga traditional jeep.

Aduna usa’y laing 39 ka traditional PUJ ang gitugotan sa LTFRB 7 nga nanagan, diin gigamit kini isip service sa mga contact tracers sa Sugbo.

Base sa inspeksyon sa Land Transportation Office (LTO) 7 ug LTFRB 7 sa mga roadworthiness compliance sa mga traditional jeepney, niabot na sa 140 ka units ang nipasar niini.

Ang duha ka mga ahensiya mihimo sa inspeksyon sa unit da Liloan, Catmon, Carcar City, ug Toledo City.

Padayon kini nilang gihimo subay na usab sa nagsingabot nga request sa mga operator.

Giseguro nga gawas sa kamaayo sa usa ka unit, masunod usab ang mga health protocol nga gipatuman sa kagamhanan aron malikayan ang pagpanakod sa coronavirus disease (Covid-19).