Gidul-itan sa pagpusil tumong sa ulo sa riding in tandem ang usa ka retiradong pulis sa Dakbayan sa Sugbo samtang nagbiseklita isip tipik sa iyang pag-ehersisyo sa alas 6:20 sa buntag sa Biyernes, Agusto 21, 2020 sa Barangay Poblacion, lungsod sa Panglao, Bohol.
Si retired Police Staff Sergeant Ramon Bolongaita namatay dihadiha sa iyang tulo ka mga samad sa ulo human pusila sa duha ka mga tawo nga nag-angkasay og motorsiklo.
Si Police Lieutenant Amelito Melloria, hepe sa Panglao Police Station nga nahinabi sa Superbalita Cebu, nagkanayon nga nga duha ka wa mailhing mga mamumuno nakit-an sa pipila ka mga saksi nga nagsunod kang Bolongaita dayong pusil kaniya.
“Gisabayan ni siya, Sir, samtang nagbisiklita unya dul-it gyud ang pagkapusil sa ulo,” matod ni Melloria sa interbyu sa Superbalita Cebu.
Sumala pa ni Melloria nga matag buntag magbisiklita si Bolongaita isip kabahin sa iyang ehersisyo.
Niadtong higayuna motuyoktuyok unta siya sa plaza dihang kalit nga mibutho ang mga mamumuno.
Si Bolongaita nagsul-ob pa og sapot pang ehersisyo dihang gipusil.
Wa kaayoy tawo sa maong dapit kay sayo pa sa buntag. Daghan untang tawo nianang mga orasa, apan sukad gipatuman ang quarantine, gamay ra kaayong mga tawo nga mag-estambay.
Ila pang gisusi ang mga establisemento nga dunay close circuit television (CCTV) camera nga makatabang sa ilang imbestigasyon.
Nagtuo si Melloria nga posibling gipanid-an na ang routine ni Bolongaita kay kada adlaw kini magbisiklita sanglit pito ngadto sa walo ka kilometro ang gilay-on niini sa Barangay Bilisan, diin siya ug iyang pamilya nagpuyo.
Nakuha sa kapulisan gikan sa lawas ni Bolongaita ang belt bag nga dunay importanting gamit, apan walay dalang armas samtang, nakasul-ob lang og sauna suit, ingon man blue nga susama og jogging pants.
Ang asawa, anak ug igsuon ni Bolongaita nga ilang nahinabi sa crime scene igo lang mipadayag nga wa silay nasayran kon duna bay hulga ang retiradong pulis.
Ila lang una nga gisabot ang pamilya kay naa pa sa kasub-anan sa kamatayon sa kanhi pulis.
Ilang kuhaon ang background ni Bolongaita dihang aktibo pa siya sa serbisyo isip sakop sa kapulisan sa Sugbo sa wa pa siya moretiro sa serbisyo.
UNANG AMBUSH
Ang pagpusil kang Bolongaita sa Biyernes ikaduha nang higayon.
Ang una nahitabo niadtong Agusto 2, 2020 sa Nivel Hills, Barangay Busay, Dakbayan sa Sugbo.
Si Bolongaita padung na mo-park sa iyang sakyanan duol sa iyang pinuy-anan dihang duha ka mga tawo nga nagmotorsiklo nipusil kaniya.
Si Bolongaita naigo sa tiyan, wala nga abaga ug wala nga bahin sa lawas.
Nadestino siya niadtong higayuna sa Regional Police Holding and Accounting Unit (RPHAU) 7.
Tulo ka mga anggulo ang gisubay sa kapulisan kaniadto isip motibo nga naglakip sa negusyo, personal nga bangi ug illegal drugs.
Way gipadulngan ang imbestigasyon sa mao nga hitabo.
Nasulod si Bolongaita pagkapulis niadtong Septiyembre 28, 1990 ug nakaretiro niadtong Enero 1, 2016 hangtod nakahuman sa iyang pagkadestino sa PRO 7.
MOTIBO DRUGAS?
Drugas ang usa sa gisubay karon sa kapulisan sa Lalawigan sa Bohol isip motibo sa pagpatay kang Bolongaita.
Nakadawat og inisyal nga impormasyon si Police Brigadier General Albert Ignatius Ferro, hepe sa police Regional Office (PRO) 7 nga si Bolongaita close in body guard ug driver kaniadto ni Jeffrey Diaz, alyas “Jaguar”, giilang drug lord sa Central Visayas nga gipatay ra usab sa mga pulis.
Si Jaguar nahungihong kaniadto nga giprotektahan sa pipila ka mga pulis hinungdan nga dali kining nakaeskapo dihang gipangita na siya ug iyang kaubanan sa Sugbo.
Matod ni Ferro nga hayan giunay sa pagpatay ang kanhi pulis sa ilang grupo o ba kaha adunay na double cross.
“I’m not sure but I believe he is in the watchlist ng mga drug syndicate group. Sa akong sketchy report, he is alleged driver and body guard of Jeffrey Diaz alyas Jaguar. So, it seems that he is with the group of Jaguar talaga pa la,” matod ni Ferro sa mga tigbalita.
Nimando si Ferro sa Bohol police ug Regional Intelligence Division nga palawman pa ang ilang imbestigasyon.
Mohimo silag back tracking sa dihang aktibo pa sa serbisyo si Bolongaita.
“I will ask my R2 and R7 to conduct a back tracking. What happened sa last 2015. It might be a big break for us if we will have a historical narrative or historical information para atong matiwas tong unsay ultimate motive didto sa pag patay sa retired policeman,” dugang ni Ferro.
Wa usab wad-a ang ubang motibo sama sa personal nga bangi nga apil sa gitan-aw sa Bohol police.