NISAAD ang Department of General Services sa Dakbayan sa Mandaue nga matapos ang pagtukod sa Norkis Park isip isolation center karong Agusto 28, 2020.
Nipasalig si Engr. Marivic Cabigas, pangulo sa DGS, nga tapuson nila ang isolation center sa Norkis Park uban sa isolation center sa Cebu North Bus Terminal niining semanaha.
Sumala ni Cabigas nga ang isolation center sa Norkis Park 50 porsyento na nga nahuman.
Sigon pa niya nga nakigatambayayong sila sa mga kawani sa City Engineering’s Office (CEO) aron dali mahuman ang isolation center.
Gani adunay 20 ka mga kawani sa DGS ug 11 sa CEO ang nagtukod sa isolation center sa Norkis Park.
Niadtong Agusto 11, 2020, si Mandaue City Mayor Jonas Cortes nagpahigayon og inspeksyon sa lugar.
Gihawanan dayon sa mga kawani sa DGs ang mga building sa Norkis Park human sa inspeksyon. Niadtong Agusto 13, 2020, matod ni Cabigas nga gisugdan na nila ang pagtukod hangtod karon.
Karon, sumala ni Cabigas nga gipahimutang na nila ang 64 ka mga kuwarto sa wala nga building sa Norkis park.
Gibutang usab nila ang quarters sa mga doktor ug nars sa stage, diin nahimutang ang swab testing station.
Gipaambit ni Cabigas nga di pabutangan ni Cortes og air-condition ang mga kuwarto.
Gisulayan ni Cabigas ug sa ubang kawani sa DGS nga mag-istar sa mga kwarto, buntag hapon ug gabii aron masuta kon di ba alimuot.
Gipasalig ni Cabigas nga maayo ra ang bentilasyon sa mga kwarto ug bugnaw ra, apan sa gabii adunay mga lamok.
Sigon niya nga mag-spray sila og mga insecticide para sa lamok aron ang mga pasyente di mataptan og laing sakit tungod sa lamok.
Bisan kon aduna nay kasilyas ang Norkis Park, sigon ni Cabigas nga nagbutang sila og dugang comfort rooms.
Gihagit niya ang iyang mga kawani nga tapuson ang pagtukod sa wa pa ang gitakda nga petsa, sa Agosto 28, 2020.
Hinungdan nga bisan pa og holiday niadtong Biyernes, padayon gihapon sila sa pagtrabaho aron mahuman ang isolation center karong semanaha.