UNSA may labing dali nga paagi sa pagpakuyanap sa usa ka sekreto, gawas sa pag-“shout-out” sa FB? Sayon ra ning himuon. Duola lang ang dili nimo suod nga tawo unya ingna siya: “Naa koy isulti sa imo ha. Ayaw lag saba sa uban”. Sigurado gyod ning moabot sa dunggan sa uban.
“Unya iyang gipinahan ang mga tinun-an nga dili manugilon kang bisan kinsa nga siya mao ang Mesiyas,” mao ang kataposang bersikulo sa ebanghelyo karong adlawa. Unsa man diay buot mahitabo ni Jesus? Ang maong pagpina nahitabo usab sa dihang sa dihang maghingilin siya og daotang espiritu o moayo siya og masakiton. Nganong dili man buot ipahibalo ni Jesus ang iyang pagkamesiyas?
May panultihon nga Linatin nga nagkanayon: “Ang bisan unsa madawat pinaagi sa paagi sa modawat”. Sa ato pa, madawat o masabot nato ang mga butang dili sa ilang pagkasila kondili sa atong pagkakità. Kon unsay atong gipaabot o gihunahunaan, mao pod kini ang atong pagsabot sa butang nga atong giatubang.
Sa panahon ni Jesus ang mesiyas usa ka tawo nga maoy mopadayon sa gingharian nga gisugdan ni David. Usa siya ka politikanhong mesiyas nga moluwas sa mga Israelita batok sa mga Romanhon. Mao kini ang gihulat sa mga tawo. Kon ilang madungog nga may moingon nga si Jesus usa ka Mesiyas, politikanhong larawan dayon ang molutaw sa ilang hunahuna.
Nadugangan pa ang pagkakomplikado sa kahimtang kay ang mga disipulo ni Jesus dugay makakuha. Diyotay ra ang ilang pagtuo. Dili sila makasabot sa gitudlo ni Jesus. Nangambisyon lang sila alang sa ilang kaugalingon, sama sa managsuon nga si Juan ug Santiago nga buot molingkod sa kiliran ni Jesus sa iyang gingharian. Usa ka pagano lamang maoy nakaila kon kinsa gayod si Jesus, ang opisyal nga Romanhon nga nakasaksi sa pagkabugto sa kinabuhi ni Jesus. Miingon siya: “Tinuod gayod nga kining tawhana mao ang Anak sa Dios!”
Mao kini nga giingnan sila ni Jesus nga dili magsaba mahitungod sa iyang pagkamesiyas. Diha lamang sa iyang kamatayon sa krus mapadayag ang tinuoray nga kahulogan sa pagkamesiyas ni Jesus.
Dili lumalabay ang pagkamesiyas ni Jesus. Lahi kini sa politikanhong gahom nga gihisgotan ni propeta Isaias. Karong adlawa ang dakog ranggo maoy hawod. Dili madugay pulihan siya. Dili ingon ani si Jesus isip Mesiyas. Molungtad ang iyang gingharian hangtod sa kahangtoran.
May plano sa pagpangluwas ang gingharian sa langit. Mabasa ni nato sa sulat ngadto sa mga taga-Roma. “Pagkabahandianon gayod sa Dios ug pagkatulogkaron sa iyang kaalam ug kahibalo! Kinsay makasaysay sa iyang hukom? Kinsa makasabot sa iyang mga paagi”. Dili gyod matugkad ang maong plano sa pagpangluwas. Mahimo lamang kining dayag sa mga tawo nga adunay pagtuo.
Ato na ba gipalanog kining dayag nga plano sa Dios ngadto sa uban?