SUPERBALITA CEBU

Abogado nga nurse, epektibo sa iyang pwesto

Atty. Julius Ceasar Entise.

WALA damha sa mga abogado sa dakbayan sa Mandaue nga magamit pa nila ang ilang medical background labi na karong tuiga nga nag-atubang ang tibuok kalibotan sa pagbatok sa coronavirus disease 2019 (Covid-19) pandemic.

Usa niini si Atty. Julius Ceasar Entise, kinsa usa ka inila nga abogado ug pipila na sab ka mga dagkong kaso ang iyang nakuptan apan tungod sa panginahanglan sa pagbatok sa pandemya, nibuhi una siya sa pagka-abogado.

“Why am I doing anything nga nurse man kong dako,” sigon ni Entise samtang nagtan-aw sa balita sa TV.

Mihalad si Entise sa iyang serbisyo ngadto kang Mandaue City Mayor Jonas Cortes ug didto na-assign siya isip pangulo sa Emergency Operation Center (EOC) sa dakbayan.

Ang EOC mao ang tighimo og mga sumbanan o polisiya apan alang kang Entise dili kini igo nga tabang hinungdan nga mogawas gyud siya ngadto sa field.

Karon nga gitukod na ang Contact Tracing Operations Center, si Entise na ang nangulo niini.

Tungod sab sa risgo sa trabaho ni Entise karon, nag-isolate siya sa ilang balay ug kon mahimo wala una siyay kontak sa iyang ginikanan nga edaran na.

Sa pagpukaw ni Entise sa iyang background sa medikal, alang kaniya malipayon siya nga nakatabang siya karong panahon sa pandemiya ug gani nanghinaot siya nga pinaagi sa iyang nabuhat, makapukaw sab kini sa ubang kasingkasing nga gustong moserbisyo.

Nahinabi sab sa Superbalita Cebu si Atty. John Eddu Ibanez, executive secretary ni Mayor Cortes, kinsa tulo ka tuig nga nagtrabaho isip operation room nurse sa usa ka ospital sa Cebu City niadto.

Gatuo si Ibanez nga nalimtan na niya ang iyang pagka-nurse human siya nanumpa isip abogado.

Mitug-an si Ibanez nga nagamit gyud ang iyang background sa medikal sa dakbayan labi na sa pagdesisyon karong panahon sa pandemya.

Sigon ni Ibanez nga kauban sa ubang mga abogado nga adunay medical background sama ni Entise, kada mag-meeting sila ni Mayor Cortes, aduna kini medical basis ug dili lang sa legal nga aspeto.

Gawas niini, si Ibanez mao sab ang mangunay sa pagkumusta ngadto sa pasyente sa Covid-19 sa dakbayan.

Matod niya, mas maayo personal nga mokonsulta ngadto sa pasyente inay mag-agad lang sa assessment sa doctor.

Alang ni Ibanez nga pinaagi niini makatabang siya ngadto sa mga pasyente nga gi-isolate nga nag-atubang og mga emosyonal ug mental nga hagit gani ang uban pa niini ma-discriminate.

Gani miingon siya nga malipay gyud siya kon ang usa ka pasyente magpasalamat niya tungod sa pagpangumusta ug maningkamot nga maayo sila.

Si Ibanez ug Entise pipila lang sa mga abogado nga adunay medikal background nga nagtrabaho sa dakbayan apan bisan paman nga dugay na kini nilang gibansay wala kini makapugong nila nga motabang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!