NM Enriquez naghari sa Cepca Online Blitz

WALA kapugngi si National Master (NM) Rogelio Enriquez Jr. sa paglangkat sa titulo sa Cebu Executives and Professionals Chess Association Online Weekend Blitz Special—Nobuyuki Takayasu Birthday Chess Challenge niadtong Agusto 22, 2020.

Si Enriquez, nga migamit sa online name nga Polgoso, mitali og 15.75 tiebreak points aron lupigon si Michael Ventulan nga adunay 12.25 tiebreak alang sa All-Cepcans nga kampiyonato.

Ang duha ka chess wizards nitapos sa lima ka rounds nga pulos adunay upat ka mga daog ug usa ka tabla para sa 4.5 puntos mao nga gikinahanglan ang tiebreak.

Si Ventulan mikuha sa ikaduhang dapit samtang sila si Sheila Khan Sepanton, Jonathan Canque, Eden Diano, Peterson Sia, Rosendo Yamyamin ug Michael Tinga mao ang mikompleto sa Top 8.

Adunay gihatag nga ganti ang organiser alang sa Top 8 All-Cepcan players.

Si Laila Nadera maoy misakmit sa titulo sa Group B Cepcans/ Ladies human kini mitali og 32 puntos.

Si Manilyn Cabungcag (28) mikuha sa ikaduhang dapit samtang si Nick Cuizon (26), Dr. Leo Lofranco (24) ug Fiona Guireme (21) mao ang mikompleto sa Top 5.

Sa laing bahin, midominar si Grand Master (GM) Joey Antonio sa Cepca Weekend Tournament nga gi-sponsoran ni US-based Cepca member Josito “Jojo” Dondon niadtong Agusto 23, 2020.

Gitapos ni Antonio ang torneyo nga adunay 67 puntos human sa 23 ka mga dwua ug adunay 78 percent win rate.

Mikuha sa ikaduhang luna mao si NM Rommel Ganzon nga adunay 56 puntos.

Si NM Merben Roque (53), NM Jasper Rom (50), Allan Pason (44) ug International Master Chito Garma (42) anaa sa ikatulo ngadto sa ikaunom nga mga puwesto.

Ang duha ka mga torneyo nga gipasiugdahan sa Cepca giduwa sa lichess.org.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph