NABULABOG ang kamingaw sa kahapunon niadtong Dominggo, Agusto 23, sa usa ka compound sa Sityo San Roque, Barangay Basak San Nicola, Dakbayan sa Sugbo.
Kini human nga duha ka mga puya nga gituohang kaluha nakit-an sa usa sa mga residente sa maong lugar.
Matod ni konsehal Giovanne Tabada nga ang unang puya nakit-an pasado alas 5 sa hapon niadtong Dominggo.
Kini gisulod sa usa ka supot nga gamay.
Usa ka residente nga nagpuyo sa maong dapit nakabantay sa plastic bag nga gibilin lang sa usa ka kahoy ug wa gilabay sa basurahan.
Dihang gisusi, nakurat ang lumolupyo kay puya ang sulod ug gibana-bana nga anaa na sa tulo ka buwan.
Dugang ni Tabada nga nagtuo sa mga residente nga mao ra kadto, apan usa ka oras ang milabay ilang nakit-an ang usa ka iring nga dunay giatangan ug suwayan sa pagdagit.
Dihang gisusi, dakong kurat sa mga nakakita nga lain na usab nga puya ang ang ilang nakit-an nga naputos na sa abug sa yuta. Si Tabada, ubos sa mando ni Kapitan Norman Navarro, nisusi sa dapit kon kinsa ang posibleng inahan nga naglabay sa puya.
Si Tabada nagtuo nga ang duha ka puya kaluha.
Samtang si Police Master Sergeant Nicolo Gonzales sa Mambaling Police Station nga nahinabi sa Superbalita Cebu niingon nga sila ug ang barangay Basak San Nicolas maoy nagtinabangay sa pag susi sa inahan sa bata kon asa nagpuyo.
Matod ni Gonzales nga siya nagtuo nga anaa lang sa duol ang naglabay niini ug duna lay gisugo. Lakip sa sutaon sa kapulisan ug sa barangay ang kadtong mga mabdos nga kalit lang nihiyos ang tiyan.
Ang mga barangay health worker sa barangay gitahasan sa pagsuta sa mga mabdos kon kinsa ang mihimo sa way kukaluoy nga paglabay sa mga puya.