WA TUYOANG nakakita ko sa bag-ong fitness show ni Jessy Mendiola sa TV5 nga “Fit for Life” man tingali ang taytul.
Haskang ugaha modag hosting sa babaye as in walang kabuhay-buhay.
Pero nganong mao man sad ni gihatag sa TV5 nga show kang Jessy nga kahibawo man ta nga dili hosting ang forte sa aktres?
Naa say bag-ong morning show ang TV5 nga “Chika Besh” nga gi-host nilang Pokwang, Ria Atayde ug Pauleen Luna nga maorag copycat ra sa “Magandang Buhay.”
Maayo pa gitaytulan na nilag “Pauleen Luna and Pokwang morning show” kay sila ra may sigeg tabi. Si Atayde gihimo ra nilang dekorasyon. Apan contract artist diay gihapon ni si Atayde sa Star Magic bisan naa siya karon sa Kapatid.
Sagad sa mga bag-ong show karon sa TV5 mga blocktimer courtesy sa Tape (Television and Production Exponents Inc.) nga mao say producer sa Eat Bulaga ug kahibawo man ta nga usa sa mga tag-iya aning Tape si Vic Sotto nga bana ni Pauleen.
Apan tingali sa dili pa mangambisyon ang TV5 sa entertainment dapat tarungon una nila ang ilang programming ug reception nga puwerteng batia. Basin nagtuo sila kay wala nay ABS-CBN moklik na ang ilang entertainment. Dili ingon ana kasayon uy.
Kon ako say Kapamilya star mas maayong maghinayhinay lang sa mga desisyon. Tan-awa si Liza Soberano wala niya gi-deny nga duna siyay mga offer nga nadawat gikan sa laing TV station apan mas prayoridad kuno gihapon niya ang ABS-CBN.
Kay pila ra bayay ligid sa panahon. Kahibawo na ka sa pulitika weder-weder lang. Kon kanang 68 million subscribers sa YouTube channel sa ABS-CBN mobotar na tanan sa 2022 election siguradong mamutos na ang dapat mamutos.
Pila na ba kabuok sikat nga artista ang nabugnaw ang career human nibiya sa ABS-CBN sama nilang Aga Muhlach ug Sharon Cuneta? Mao nga ang ending balik-Kapamilya gihapon.
Si Martin Nievera ug Gary V. na lay kuhaig base bisan wa silay laing project sa ABS-CBN kundi ASAP pero wa gyud sila mamalhin kay kahibawo sila mas dako silag mileage sa ABS-CBN.
Bisan si Morissette Amon niangkon sa akong interbyu niya sa una nga kon wa kuno siya moapil sa The Voice wa gyud siya mailhi sa mga tawo. Puwerteng dugaya niya sa TV5 pero sa ABS-CBN ra siya nisikat.
Kahibawo ta nga temporary ra ning nahitabo karon sa atong nasud. Sa madugay o madali mobalik ra gihapon sa normal ang tanan aron magmadaugon sa makausa pa ang katarungan.