SUPERBALITA DAVAO

Serbisyo sa Phase 1 sa Deca Indangan

Nota Bene

NAGMALAMPUSON ang gipahigayong piniliay sa mga interim nga board of directors sa Deca Homes Indangan Phase 1 Homeowners’ Association (HOA) niadtong Dominggo, Agosto 23.

Nahimong mga bag-ong miyembro sa board sila si April Ross Ang, Ronald Arribe, Bryan Subaan, Juvelyn Misajon ug Gil Casas. Gawas kang Casas, ang upat kay mga bag-o nga andam moserbisyo sa katawhan sa Phase 1.

Naagni ang mga lumulupyo nga tukuron pagbalik ang HOA sa panahon sa Covid-19 pandemic diin nagkinahanglan ug aktibong opisyales nga mokutay sa Barangay Indangan alang sa ayuda ug sa uban pang isyu sa subdivision kabahin sa seguridad, tubig ug basura.

Kung balik lantawon ang kasaysayan sa subdivision, makita nga ika-upat na kini nga hugna sa mga opisyales. Ang una mao ang iya sa kumanya sa Deca Homes Inc. sa tuig 2014 ug nahimong presidente si Mary Ann T. Chua isip requirement sa Housing and Land Use Regulatory Board (HLURB) sa pagtukod ug subdivision.

Ang ikaduhang hugna sa “interim officers” mao ang gipangulohan ni Florito Crabajales niadtong 2015 ug gisundan sa eleksyon atol sa Special General Assembly niadtong Disyembre 19, 2015 diin napili nga presidente si Riza Vil A. Ramos nga nagserbisyo sa duha tuig nga termino hangtod sa Disyembre 2017.

Apan sa tuig 2017 nibalhin sa pagpuyo si Ms. Ramos ug ang bise-presidente nga si Alan H. Ong busa walay nahitabong General Assembly niadtong tuiga aron mopuli unta ang bag-ong hugna sa board.

Ang gitutukan nga programa niadtong panahona ubos ni Ms. Ramos mao ang pagbutang ug gate sa intrada sa subdivision, pagbutang og bulletin board sa HOA sa kilid sa gate (nga gibungkag tungod sa pagpadako sa dalan), pagserado sa likod nga koral nga ginaagian sa dili taga-Phase 1, pagbutang ug suga sa basketball court nga dako, paghimo’g ronda sa tanod ug security guard tungod sa kawat, paghigpit sa pagsulod sa sakyanan pinaagi sa Vehicle Stickers, paghatag og Certificate of Residency sa mga taga Phase 1 para sa barangay clearance, pagpa-regular sa pagsulod sa Cenro Garbage Truck, ug uban pa.

Ang wala matuman o madayon nga plano mao ang petisyon sa pagpaayo sa serbisyo sa BP Waters, pagkuha sa detalye sa “membership fee” nga gikolekta pinaagi sa BP Waters ug pag-turnover sa records gikan sa pinakaunang opisyales sa HOA. Wala sab madayon ang giplano nga pagpangayo’g proyekto nga opisina sa HOA ug ang pag-construct sa chapel sulod mismo sa subdivision.

Gawas sa pagpalig-on sa HOA, para kanako mao usab kini ang dut-an sa bag-ong board ilabi na sa pag-update sa papeles niini sa HLURB (DHSUD) ug sa BIR nga wala nahimo sa mga nangaging opisyales. Sa pagkatinuod, lisod ug boluntaryo ang trabaho sa mga opisyales sa HOA ilabi na kung duna usab silay trabaho o panginabuhian nga dili mabiyaan.

Busa angay nato silang suportahan kay ila lamang gilantaw ang kabulahanan sa katawhan. Congratulations sa mga nakadaug og salamat nila ni Tara-Janelle Estrada, Michele Basco ug Nicolas Delos Reyes sa election committee, ug sa tanang nagtabang nga mahimo kining malampuson. Good luck!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph