KIDAPAWAN CITY -- Mangilngig nga kamatayon ang gisamputan sa lider sa mga lumad alas 2:00 sa hapon niadtong Dominggo.
Kini human nga gawas sa pagpusil, gitagod-tagod pa gyud og tigbas sa mga suspek si Milda Ansabo Celis.
Si Celis maoy lider sa mga lumad sa Sitio V, Barangay Mahongcog, Magpet, North Cotabato.
Sa taho gikan sa Magpet Municipal Police Station, nasayran nga naglakaw lamang ang biktima paingon unta sa iyang uma, uban ang anak niini, sa dihang giatngan og tulo ka mga tawo ug gipusil gamit ang 12 gauge shotgun.
Wala pa matagbaw ang mga suspek, gitagod-tagod pa sa pagtigbas ang nagkadaiyang bahin sa lawas ni Celis gamit ang mahait nga sundang.
Nakadagan hinuon ang anak sa biktima paingon sa luwas nga dapit samtang mga suspek miikyas paingon sa bukiron nga bahin sa nahisgutang barangay.
Patay gilayon si Celis human makaangkon og daghang mga samad pinusilan ug tinigbasan sa lawas.
Sumala pa sa pamilya sa biktima nga ka-tribo lamang ang nagpatay kaniya.
Apan kapulisan sa Magpet MPS padayon pang nagsubay sa hitabo aron nga matumbok ang tinuod nga nagpaluyo niini ug masayran ang motibo nganong gipatay ang biktima.