Super Negusyo: Pagbangon taliwala sa pandemya

Hulagway gikan ni Donald Raki Pacio
Hulagway gikan ni Donald Raki Pacio

DAGHANG negusyo ang nahugno, indibidwal nga nawad-ag trabaho, human mihapak ang Covid-19 sa kalibutan.

Dinhi sa Pilipinas, ubay-ubay ka mga negusyo nakadesidar nga manira tungod di na kasugakod sa inadlaw-adlaw nga gastos.

Usa si Donald Raki Pacio sa minilyon lamang nga halos mawad-i na og paglaum human maapektuhi ang panginabuhian sa Covid-19.

Si Pacio usa ka events hosts sa Davao City, diin tanang raket anaa kaniya makasustenir lang sa gastos matag adlaw.

"Halos makadepress sa sama nako nga freelancer host, talent and artist. Nag-marketing sab ko. Pag-announced sa total lockdown makahugno, pero gihuna-huna nako para man ni sa atong kaayuhan."

Tungod niini, nakadesidar siyang mopauli sa iyang pamilya sa Davao de Oro.

"Maka-depress gyud kaayo kay sayang ang mga nakaline-up na mga raket gigs ug mga biyahe apan wala gyud koy mahimo," dugang niya.

Aron malingaw ang kaugalingon, gisuwayan ni Pacio ang pag-vlog, nagacover sab siya og kanta, ug ubang online activities.

Nanira man ang pultahan sa oportunidad, apan mibukas kaniya ang laing ganghaan sa kaayuhan.

Usa ka higala niyang si Cristy Lariosa mipaila-ila kaniya labot Food Franchising Business.

"Naisip nako nga suwayan siya kay nakita sab nako nga in-demand pud sa market."

Tungod bag-o sa maong natad sa negusyo, gitun-an niya og maayo ang estratehiya sa pag-market og franchise.

Gigamit ang nagkadaiyang social media platforms ug koneksiyon sa mga higala aron ipasibaw ang 7-in-1 Food Fiesta and SanChai Milk Tea nga negusyo.

"Kesa magmukmok lang ko kay walay trabaho, gi-challenge nako akong self nga tun-an ang business. Lisud siya kay wala ko ka-attend og trainings, so gina-apply nako akong natun-an sa pagmarket on field, uban sab sa tabang sa akong boss, nakakita gyud kog client."

Unang kliyente ni Pacio mao si Judy Broce nga mibilib kaayo sa maong negusyo, nga gisundan sab sa magtiayong Andre ug Rosie Arsenio.

"I'm very happy kay they are both satisfied sa akong gi-offer to them nga bag-ong venture sa business."

Karon, padayon sa pagpaningkamot si Pacio alang sa pamilya. Alang niya, mibati man siya og kasubo human miigo ang pandemya, apan karon, maikagon na siyang atubangon kini inubanan sa dakong pagsalig ug paningkamot.

"My message sa kauban nako sa industrya labi na sa mga local artist ug events people nga nawad-an pod og panginabuhian nga don't limit yourself sa usa lang ka butang. Explore and explore sa mga things na you will learn ug earn. Daghan paagi para makasurvive tang tanan, salig lang sa Ginoo ug dili lang gyud mawad-an ug paglaum."

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph