DAVAO DE ORO -- Wa damha sa viral TikToker nga walay mga tiil nga makarelasyon sa maanyag nga follower nga karon nahimo niyang hinigugma ug gilauman nga makita sa personal karong umaabot nga bulan sa Disyembre ning kasamtangang tuig.
Si Diego Garcia, 24, ulitawo nagtrabaho isip office clerk sa Provincial Tourism sa Davao De Oro ug molupyo sa Purok 8, Barangay Mainit, Nabunturan, nagbutyag dihang nahinabi sa Superbalita Davao pinaagi sa selpon nga magtulo ka bulan na ang ilang relasyon sa iyang hinigugma nga usa ka freelance model nga ginganlan og Nikke Magracia, 24 anyos nga taga Malabon City, Manila.
Gisulti ni Diego nga follower niya ang maanyag nga dalaga nga kanunay'ng naga-like sa iyang mga video sa Facebook diin pinaagi sa social media, iya kining nakaila ug pormal nga nahimong girlfriend dihang gisugot siya niini niadtong, Mayo 5, 2020.
Si Diego gipakatawo nga walay mga tiil apan wa kini mahimong babag aron abton ang mga pangandoy sa kinabuhi uban sa giya sa iyang inahan nga suma pa maoy naghatag kaniya og inspirasyon aron maabot ang estado nga karon iyang nahimutangan.
Nag-viral ang mga gimugna niyang video, miabot og 8,000 ang mga subscribers diin sa YouTube miabot kini sa 6,000 ang mga followers.
Malaumon si Diego nga human ma-feature sa Tunay na Buhay sa GMA Kapuso Network ang iyang kinabuhi, matuman ang usa pa niya ka pangandoy nga mahimong artista ug makatrabaho sila Janine Gutierrez ug Maja Salvador sa usa ka horror ug love story nga pelikula.
Sa pagkakaron, gipangandaman ni Diego ang pag-abot sa iyang hinigugma nga si Nikke nga misaad nga makigkita kaniya sa personal dinhi ning probinsya karong umaabot nga bulan sa Disyembre bisan pa man kung dunay hulga sa coronavirus disease (Covid-19).