DAMGO unta ni Kevin Jake “KJ” Cataraja nga mahimong world champion ug makahatag og world title ubos sa Ala Boxing Gym.
Apan kuli na kining mahitabo pa. Kini human nga sa niaging semana, ang Ala Boxing Promotions mipahibawo sa ilang hingpit nga pagbiya sa boxing human sa 35 ka mga tuig nga mabulokon ug makasaysayon nga pag-umol og mga dekalidad nga mga boksidor ug pagpahigayon og impresibong boxing promotions nga mikatap usab sa ubang kanasuran.
Pilit man tuod nga gidawat ni Cataraja ang kamatuoran apan di niya matuki ang temporaryong pagkagusbat sa iyang pagbati.
“Sa tinud-anay lang sir, nakahilak ko pag announce gyud nila. Usa gyud ko sa masakitan kay diha gyud ko nagdako. Ikaduhang balay na nako,” ni Cataraja pa sa sa online interview sa Superbalita Cebu.
Ang 25 anyos nga lumad nga taga Tabuelan, Cebu gipanglantawan sa pipila ka boxing experts nga adunay potensyal nga mahimong world champion.
Gani usa sa nakapanglantaw niini mao si kanhi two-time world boxing champion Gerry Penalosa, kanhi sakop sa orihinal nga Ala Boys.
“Maayo nang bataa. Ganahan ko sa iyang style, mo-champion na siya,” matod ni Penalosa.
Hinuon wala usab isalikway ni Penalosa ang kapabilidad sa mga kauban ni Cataraja sama nila ni Prince Albert Pagara, Jeo Santisima ug Melvin Jerusalem nga mamahimong world champion.
Gisaysay ni Cataraja nga gitawagan siya sa ilang chief trainer nga Edito Villamor pipila ka adlaw human sa ilang panaghugpong.
Hinuon niadtong higayuna, wala pa kini niya mapanumbaling apan sa dihang giguba na pagsugod ang ilang pasilidad, didto wa niya kalikayi ang pagdagayday sa iyang mga luha nga sa samang higayon naghandom sa iyang kaagi.
“Nitawag si Coach Edito nipasabot nako about sa ila meeting but dili pa to nako feel. Diri na ko nasakiti ug na-emosyonal sa pagguba na gyud sa among gym ug ring. Nakahunahuna ko sa mga kaagi namo didto,” dugang ni Cataraja.
Gibutyag usab ni Cataraja nga dako kaayo nga natampo sa iyang kalampusan sa edukasyon ang iyang pagkasakop sa Ala Gym.
Si Cataraja, samtang nagpadayon ang iyang professional boxing career, nagpadayon usab og tungha sa kursong Criminology nga iyang nahuman sa niadtong tuig 2017.
“Nine years old pako diha nila sir. Sila hinungdan nganu nakakuha kog scholarship sa UV. Sila pud hinungdan ngano naka-graduate ko ug na ilado ko sa tibuok kalibutan sa boxing,” dugang saysay ni Cataraja.
Apan ang kalit ug masakit nga pagsira sa Ala Boxing wala makatandog sa iyang mga tinguha ug pangandoy nga sa umaabot nga mga adlaw mahimo siyang world champion.
Gusto usab niya nga ipadayon ang tanang mga leksiyon nga iyang nakat-unan ug naumol ubos sa pagdumala sa Ala Gym.
Dala ang 11-0, 9 KOs nga baraha, wa isalikway ni Cataraja ang pagtapon og laing manager nga maoy makagiya kaniya ugma damlag.
Ning higayona, maampingon ug nanghinaot nga unta sama sa pagdala sa Ala, maayo usab kining motratar kaniya.
Nasubhan si Cataraja isip usa ka pro fighter niadtong Hulyo 11, 2015 pinaagi sa pag-knockout sa Indonesian fighter nga si Ardi Tefa sulod sa unom ka rounds sa Waterfront Hotel and Casino-Lahug.
Gikan niadto, gisundan pa kini og impresibong knockout nga mga kadaugan batok sa pipila pa ka mga local ug international fighters.
Ang katapusan niyang saka ibabaw sa ring mao ang pagpakigbatok sa beteranong si Crison Omayao diin iya kining gipaundang sulod lang sa tulo ka round niadtong Septiyembre sa niaging tuig.
Hataas pa man tuod og latason si Cataraja sa iyang karera, apan siya sayod nga kini padulong ngadto sa kalampusan sa iyang damgo.
Alang kaniya, ang Ala Boxing Gym maoy dakong tipik sa higayon nga makab-ot na niya ang tiunayng kalampusan isip usa ka boksidor. (Jun Migallen)