KON atong basihan ang mga bag-ong kalamboan sa kaso sa Covid-19 sa Cebu City, adto na kita paingon sa modified general community quarantine (MGCQ).
Sa 68 sa 80 ka mga barangay sa siyudad ang giingon nga Covid-free na. Sa ato pa, 12 nalang ka mga barangay ang adunay ginagmay nga kaso.
Sa mga uwahing record nga gipagawas sa Department of Health (DOH) 7, anaa nalang sa 20 ngadto sa 22 ka Covid-19 cases matag adlaw.
Dakog kahigayunan ang rekomendasyon sa Inter Agency Task Force ( IATF ) ngadto sa buhatan alang sa MGCQ.
Apan atong paabuton ang estriktong polisiya sama sa limited quarantine pass, face mask ug face shield.
SALAMAT NI LABELLA
Akong nabantayan nga ang gibantayan sa mga taga opisisyon nga kaalyado ug tigpaluyo ni kanhi mayor Tomas Osmeña ang sayop ni Cebu City Mayor Edgardo Labella.
Karon sa pagminos sa kaso sa Covid-19, wa gani sila makapasalamat kang Labella.
Kon taas ang kaso sa Covd-19, ang mayor ang han-ukan ug iduot sa kampo ni Tomas.
Ang ilang gipasalamatan sa grupo ni Osmeña ang IATF ug frontliners ug wa giapil si Labella tungod sa pamulitika.
LUNGSOD BOLJOON
Misibaw nasab ang pamulitika sa kontra sa pulitika sa kampo nila ni Mayor Merlou Derama sa lungsod sa Boljoon.
Nidemanda ang mga kanahan sa paghatag og sumada sa mga nagasto sa lungsod sa Covid-19 crisis. Sentido komon, wa na kinahanglana ang awhag sa oposisyon kay transparent man ang gobiyerno ni Derama.
PINAMUNGAHAN
Puwerting lipaya sa kabataan ug mga dagko nga mahiligon sa duwang badminton kay nahuman na ang gipatukod ni Mayor Glenn Baricuatro nga duha ka badminton covered court.
Pipila sa mga kasayuran nga akong nakuha ilang giingon maka-focus na sila sa pagduwa.
Wala na kinahanglana nga moadto pa sa Naga City, Carcar ug Cebu City aron moduwa og badminton.
Maayo nga ang gihimo ni Baricuatro himuon sad sa ubang mayor. (Email efrenlonzon71@gmail.com / Text: 09235562777)