DALIT ning Kakataskatasang Panginwan,
Dangka 12: Sunis 1-20, Makatagulaling A Kasuywan
(The Song of The Supreme Lord, 12: 1-20: Devotional Service)
I Ardyun kitang na: Ing sanu ing tuturing lakwas kapantas-pantasan, detang masalese makasuglung king Kekang makatagulaling a kasuywan o detang sasamba king alang pangataung Braman, ing e mayayakit?
Ngana ning Nwang Panginwan: Yang makatuntun king Kanakung aske tau, parating makasuglung king pamanyamba Kanakung ating masikan at makapaymbabo kapanaligan, ya ing Kanakung tuturing a kapantas-pantasan.
Dapot detang ganap deng sasamban ing e mayayakit, itang makabili lagpas king kamalitan da ring panandam, ing makalaganas, e ataruk, makasamas at e agagalo—ing alang pangataung kagli ning Lusuk a Katutwan—kapamilatan ning pamanampat karing miyayaliwang panandam at maging patas makayadya karing balang metung, ding taung deti, makasuglung king kapakinabangan ding sabla, king katatawlyan dasnan da Ku mu rin.
Para karing maki-isip a makayagyag king e mayayakit, alang pangataung arle ning Kakataskatasan, ing panyulung masulit. Bang mika-panyulung king katunurang ita parating masulit para karing mami-katawan.
Para king ninuman a sasamban na Ku, susuku na ngan ing sablang daraptan na Kanaku at layun makatagulaling Kanakung alang pangalili, makasuglung king kasuywang makaparikil at parating migunam-gunam Kanaku, a tintun na na ing isip na Kanaku, O anak nang Parta, para kaya Aku ing mabilis a talapangabus king laut ning beytan at kamatayan.
Ituntun me ya kabud ing isip mu Kanaku, ing Kakataskatasang Pangatau ning Punbatala, at isuglung mu ing sablang katalinwan Kanaku. Kanita mye kang parati lub Ku, alang pamikakunu.
Makamal kung Ardyun, O talapanyambut ning pibandyan, nung e me aytuntun ing isip mu Kanakung alang pangakawani, kanita tukyan mu na la mu ring makatuntung paralan ning yoga ning kasuywan. King paralang ayni tumubu ing kapagnasan bang dasnan mu Ku.
Nung e mu la aysane ring tuntunan ning yoga ning kasuywan, pakikwanan mu namung gawa para Kanaku. Pauli ning kapamilatan ning pamangawa para Kanaku miras ka king kapantas-pantasang tuntungan.
Nung, dapot, e mu arapat ing pamangawa king pamisip ayni, kanita pakikwanan mung kimut a sasakwil mo ngan ding bunga ring sablang gewa mu at pakikwanan mung makabili king sarili.
Nung e mu agyung gawan iting dapat ayti, kanita isuglung mu ing sarili mu king pamangambul king belwan. Lakwas pang mayap king belwan, nanupata, ya pin ing pamigunam-gunam, at lakwas pang mayap king pamigunam-gunam ya pin ing pamisakwil karing bunga ring dapat, pauli ning kapamilatn ning pamisakwil ayti, ninuman mika-kapayapan isip.
Ninu mang e marirya dapot maganakang kakaluguran karing sablang mabibye lelangan, ing e mimisip king sarili na anting makibandi, ing alang maling pamituring king sarili at patas mipara king saya at lugma, ing parating migaganap at makasuglung king makatagulaling a kasuywang ating kabitasan at ing maki-isip at katalinwang mamayun Kanaku—bina yang mal Kanaku.
Ya a mibili king kasakitan at yang e mababalisa king kapigaganakan, yang matatag king ligaya at kabigwan, bina yang mal Kanaku.
Ing talasuyu a e mamasa karing pangkaraniwang pupulanditan ding pamirapat-dapat, yang dalise, pantas, alang kapigaganakan, alang nanu namang kaplas, at yang e magpumilit manikwang bunga, bina yang mal Kanaku.
Ninu mang miparang e kakalawat tula at lugma, yang miparang e managulele at magnasa, at miparang sasakwil karing mapalad at e mapalad a bage, mal ya Kanaku.
Ninu mang patas karing kakaluguran at kasalang, yang pante talakad king dangalan at kamarinayan, pali at dimla, ligaya at lungkut, kasikatan at kalawsan, yang parating ligtas king kasalatan, parating taimik at makagyu king nanu man, yang alang masabal king nanu mang tuknangan, yang makatuntun king belwan at makasuglung king makatagulaling a kasuywan, bina yang mal Kanaku.
Yang mamintu king alang kapupusang dalerayan ning makatagulaling a kasuywan at ganap a susuglung king sarili nang maki-kasalpantayanan, gagawan na Kung kakataskatasang parasan, bina yang binang mal Kanaku.
***
Ding milabas a sunis king babo nini, pekisabi na lang mayap ilikas king Kapampangan manibat king English ning kanakung malambat nang pekamayap a kakaluguran–manga limampulung banwa na migit–ing abe ku na inya pang kayanakan, i G. Conrado Contreras. Manuknangan ne ngeni king San Francisco karin king Amerika.
Metung ya karing talapamasa ning Kapisik manibat king panaun a abalu ne iti keng website ning SunStar Pampanga at angga man ngeni e ya kanu sasawang mamasa karing balang sanese mipapalwal keni.
Ing kakaluguran kung ini metung yang talagulis at mailig king impressionism a yang gagawan na karing gugulis na. Metung ya namang manalig at talatuki king kasalpantayanan a mibansagang Vaishnavaism kanita pang libutad na ning pulumbanwang 1970. Iti ya ing pamanyamba kang Lord Vishnu a ing Keyang pigmulang pangatau ya pin i Krishna—ing Kakataskatasang Panginwan a migsalita king Bhagavad Gita o Dalit ning Kakataskatasang Panginwan–nung sanung ing metung a dangka niti yang makapaksa ngeni king Kapisik.
Ing paksa kanitang Agostu 12, ya mu naman ing mekisabing mayap pepa-Kapampangan.
Inyang Agostu 12 aldo kapagmasusyan king aldo beytan nang Ginung Krishna at ngeni naman kapagmasusyan king aldo beytan na ning pekadakilang dili karing talasuyu Na—i Radharani, awsan da namang Radhe at Radhika.
Sana aburi me ining pamaglikas a gewa ku kakaluguran, Conrado. Haribol!
***
PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.
PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.
Malyaring sumulat king garciakragi@yahoo.com para karing kutang o munikala.