ANG Cebu City Police Office (CCPO) milusad sa Task Force Kasaligan isip katambayayong sa pulis para pagmintinar sa kahapsay ug kalinaw aron mapabilin ang pag-ubos sa kaso sa coronavirus disease 2019 (Covid-19) sa Dakbayan sa Sugbo.
Si officer-in-charge Police Colonel Josefino Ligan maoy nipasiugda sa force multiplier, kinsang mga miyembro graduwado sa kursong Criminology nga adunay height nga 5’5” pataas.
Ang Task Force Kasaligan gusto ni Mayor Edgardo Labella nga ipatuman gumikan sa hulga sa Covid-19.
Kini langkuban sa 200 ka mga Criminology graduate, aprobado na ni Labella, nga magsugod sa unang semana sa Septiyembre, 2020.
“The purpose of this task force is to beef up the seemingly vacuumed security forces if ever those PNP personnel will be returning back to their mother unit. This will certainly help in implementing the IATF guidelines and their other functions will be conducting rekorida patrol, information dissimination and also the fight against criminality,” padayag ni Ligan.
Ang mayor, sa iyang bahin, nidayeg sa programa nga gimugna sa liderato ni Ligan sanglit iyang nakita nga dako kini og ikatampo sa komunidad.
“Akong nakita nga this is a very laudible project of CCPO under the stewardship of the City Director Colonel Jes Ligan. Kay angay nato mahibaw-an, labi na nga ang SAF, nibalik na sa ilang mother unit. Tua na sad sila sa Manila gumikan sa pag-surge sa ilang kaso sa Covid ug nimenos ang atong police force. So, this will serve as force multiplier of our PNP,” padayag ni Labella.
Karong semanaha, ang CCPO magsugod na og recruit sa mga graduwado sa Criminology.
Ang City Government maoy mohatag sa honorarium balor og P7,000 matag buwan matag rekrut, kinsa motrabaho sulod sa walo ka oras.
Mo-duty kini gikan sa Lunes hangtod sa Biyernes ug hatagan usab og libreng uniporme.
Mangalagad sila hangtod sa Disyembre, apan ipaubos una sila sa refresher sulod sa tulo ka adlaw sa di pa sila i-deploy ni Ligan.
Dunay mga tinguha nga ang Cebu City mapaubos na sa mas lugak nga modified general community quarantine (MGCQ).
Sukad niadtong Agusto 1, 2020, ang Cebu City gipaubos na sa GCQ tungod sa nagkaminos nga conavirus infections.
Ang Department of Health (DOH) niingon nga padung na mo-flat ang gidaghanon sa Covid-19 infections kada adlaw.
Nag-target usab ang DOH nga mapaubos na sa MGCQ ang Cebu City, apan di lugakan ang pagpatuman sa health protocol.