HANGTOD nga wa pay pormal nga appointment nga molingkod isip acting mayor si Bise Mayor Julito Flores sa lungsod sa Barili, di pa makadawat sa duha ka buwan nga suholan ang mga empleyado sa lungsod.
Kini maoy gipahibawo ni Flores atol sa pakighinabi sa mga tigblita sa Agusto 25, 2020.
Matod ni Flores, moabot na og usa ka buwan nga wa masweldohi ang mga empleyado gumikan sa pagkasakit ug coronavirus disease (Covid-19) ni Mayor Marlon Garcia hinungdan nga way makapirma sa payroll.
Dugang ni Flores nga bag-o lang nakagawas ang mayor sa intensive care unit (ICU), apan anaa pa sa hospital.
“Yes naa pa sa hospital. Bag-o lang siya nakagawas, mga two days or three days gikan sa ICU kay gi-intubate man siya,” matod ni Flores.
Dugang ni Flores nga may 139 ka permanent ug 320 ka mga casual ug job order ang wala pa masuholi.
MAKAPULI
Matod ni Jhoaden Lucero, direktor sa Department of the Interior and Local Government (DILG) sa Cebu Province, nga gitugutan sa pag-asumir sa posisyon si Flores sa mayor.
“In the case sa balaod sa local government, kon absent ang local chief executive, indisposed siya, kon incapacitated siya to perform the duties, so mahug na siya nga naay permanent vacancy. So, naa nana siya sa law dili nana kinahanglan og recommendation namo,” pagpasabot ni Lucero.
“Ang acting mayor maka perform siya sa duties sa local chief executive except sa hiring ug firing a personnel,” dugang ni Lucero.
Sigon ni Flores nga nangutana na siya sa DILG office sa lokal nga kagamhanan labot sa kasamtangan nga sitwasyon sa lungsod.
Apan napakyas kini tungod kay wa usab mahibaw unsay buhaton.
“Oo, kay na hamper atong mga tawo gyud kay atong operations na hamper man... karon nga week pag petsa 15 wa gihapoy sweldo. Daghan na kaayog ni reklamo nako. Di ko kalihok kay wa man ta masayod kay bag-o ni nga proseso,” matod ni Flores.
Nganong di man siya moasumer nga automatic kon naa kini sa balaud?
“Sa akong bahin, dili ko kay self serving para nako. Inig sulod nako didto pangutan-on ko, uy nganong naa man ka diri? Bisan pa og by means of succession... Mangayo kog formal. Basta ako ni serve ko isip vice mayor in my capacity, dili ko nga moadto ko sa office ni Mayor unya ako nay mamirma didto,” dugang ni Flores
Hinuon andam si Flores nga dawaton ang tahas aron di malangay ang pagsuhol sa mga empleyado ug uban pa nga transaksyon sa lungsod.
Gilaraw niya nga kon aduna nay pormal nga appointment, ang konseho mohimo og usa ka special session aron paghatag og katungod sa bise mayor sa pagpirma sa mga dokumento.