NANGANDAM na ang Omega Pro Sports International (Opsi) alang sa pagbalik sa boksing sa Sugbo nga naundang gumikan sa hulga sa coronavirus diasese 2019 (Covid-19).
Gibutyag ni Opsi vice-president Jerome Calatrava nga kon mapaubos na sa modified general community quarantine (MGCQ) ang mga dakbayan sa Sugbo, Mandaue ug Lapu-Lapu, puwede na sila makapahigayon og closed-door boxing event.
Kon mouyon ang panahon sa ilang plano, posibleng mahitabo ang ilang boxing promotion sa hinapos nga bahin karong Septiyembre, 2020 o ikaduhang semana sa Oktubre, 2020.
Sa miaging buwan, mitugot ang Inter-Agency Task Force for the Management of Emerging Infectious Diseases (ITAF) nga makabalik na sa ilang training ang professional nga mga boksidor sa nasod.
“Karon nagpadayon na og training ang atong boxers sa atong gym. Gitagaan naman og approval sa IATF, GAB (Games and Amusement Board) ug DOH (Department of Health) so mao na atong gibuhat,” sigon ni Calatrava sa interbiyu sa Superbalita Cebu.
Ubos sa MGCQ, tugtan na ang boxing events apan walay mga tumatan-aw ug limitado lang ang mga tawo sulod sa venue, dugang ni Calatrava.
Ang plano sa Opsi nga ipahigayon ang promosyon sa planta sa IPI sa Tingub, Mandaue City. Andam IPI sa pagpatuman sa health protocols sa maong boxing bout.
“Ang approval sa MGCQ kay 10 players ra ang pwede, so meaning lima ka parisan ang atong maximum. Among giandam ang upat ka fighters sa among stable,” matod ni Caltrava.
Ang Omega boxers nga moaway sa promosyon mao sila si International Boxing Federation (IBF) No. 9 rated light flyweight Christian “The Bomb” Araneta, Ronnie Mark “Makmak” Vicelles, Carlo Bacaro ug ang sparring partner ni Naoya Inoue nga si Pete Apolinar.
Sa upat, si Bacaro palang ang aduna nay kontra. Siya makigbatok sa lumad nga taga Mandaue City nga si Jeffrey Stella sa usa ka 6-rounder bout.
Usa sa hagit karon sa Opsi mao ang pagpangita og kontra kay kadaghanan sa mga 10-rounder fighters gikan sa gawas sa Sugbo.
“Mangita to og kontra nga dili mismatch kay di man mo-approve ang GAB ana kon mismatch ang tapad. Lisod ipangita diri kon sa Cebu lang basta mga 10-rounder fighter,” pasabot ni Calatrava.
“Sa Mindanao ta mangita ug kinahanglang MGCQ areas kay ang gi-allow nga travel is MGCQ to MGCQ man.”
Inig abot sa mga boksidor sa Sugbo, ila dayong ipaubos sa swab test sa dili pa kini ibutang sa ilang puy-anan ug dili pud tugtan ang mga boksidor nga mogawas-gawas.
Sa dili pa ang duwa, ipaagi pud og Covid-19 test ang tanang mga boksidor lakip na ang mga referee.
Sa adlaw sa away, umatnon pud sa Opsi ang mga lagda sa IATF ug mao kini ang pagbuhat og zones nga nagtakda kon kinsa lang ang pwude masulod sa inner red zone, outer red zone, yellow zone ug green zone.
Ang Opsi mokuha og production crew nga maoy mo-video sa duwa og makita kini sa mga boxing fans sa Facebook Page.
Matod ni Calatrava nga lahi gyud kini karon apan naningkamot sila nga mapadyon ang boxing nga mao ang usa sa mga kinaham nga sporting events sa Pilipinas.