NAKASIKOP ang kapulisan sa Dakbayan sa Lapu-Lapu og 141 ka quarantine violators sud lang sa duha ka adlaw, gikan sa Agusto 24-25.
Mga nakalapas nasikop sa Police Station 5 sa Lapu-Lapu City Police Office LCPO sa Millenium Park nga nahimutang ilawom sa Marcelo Fernan Bridge, habig sa Lapu-Lapu City.
Niadtong Agusto 22-23, ang kapulisan nakasikop og 30 ka violators.
Sagad mga nasikop mga menor de edad nga nakalapas sa health protocol nga way tugtang 21 anyos paubos nga makagawas sa balay ug way mga quarantine pass nga gipatuman gihapon sa Dakbayan bisan ubos sa general community quarantine (GCQ).
Ang uban kanila “nidoktor” usab sa ilang quarantine pass ug di ilaha.
Ang matag usa sa nadakpan nakamulta og P1,000 subay sa gitakda sa ordinansa sa Siyudad. Sa Miyerkules sa udto, ang tanang nasikop nakagawas na human malukat sa ilang tagsa ka pamilya.
Ang 80 porsyento sa mga nasikopp di taga dakbayan sa Lapu-Lapu, kun di, sa silingang dakbayan, sama sa Mandaue.
Matod ni Police Captain Aibert Jay Samson, hepe sa Police Station 5 sa LCPO, nga ila karong gihingusgan ang pagsusi sa mga manuroyay sa Millenium Park human masuta nga daghan ang manuroy aron mag jogging ug magpahangin.
Ang entrada sa park gibutangan na nila og pahibawo nga “No Quarantine Pass, No Entry.”
Apan ang gibuhat sa uban nga ganahan mosuroy sa lugar mao nga adto sila haduol sa dapit mag-estambay.
Ang uban adto na sa ibabaw sa taytayan magpahangin.
Ubos sa executive order nga giluwatan ni Mayor Junard “Ahong” Chan, ang mga tawo nga adunay quarantine pass kinahanglan mosunod sa ilang schedule sa coding system una makagawas sa balay.
Basehan ang katapusang numero sa ilang mga quarantine pass.
Samtang ang mga nag edad og 21-anyos paubos ug 65-anyos pataas di makagawas sa balay.
“Pwedi ra gyud mag jogging diha (Millenium Park) basta moigo ang ilang quarantine pass sa coding pero kanang 21-years old paubos di gyud pwedi kay maigo sila sa curfew. Unya, dili gyud pwedi na diha basta 10pm to 5am kay duna man sad tay curfew kada gabii. Kato nag operate ta 4am to 7am mao daghan ta nadakpan,” matod ni Samson.
Niadtong weekend, nag viral sa social media ang hulagway ug video sa mga tawo sa Millenium Park nga nagdasok ug wala na masunod ang physical distancing hinungdan nga naalarma si LCPO Director Police Colonel Clarito Baja.
Gimandoan dayon ni Baja ang Police Station 5 sa estriktong pagpatuman sa quarantine protocol sa lugar aron kalikayan ang pagtakod sa coronavirus disease (Covid-19).
Bisan kon ang siyudad ubos sa GCQ, way gitugtang residente nga makagawas nga way quarantine pass ug gipatuman gihapon ang number coding.
Gituohan nga ang padayon higpit nga patuman sa mga quarantine protocol usa sa mga rason nganong nagkagamay ang mga kaso sa infections sa coronavirus nga gipasigarbo ni Chan, kinsa niingon nga andam na kaayo ang siyudad alang sa modified GCQ.