MAS gipahugtan sa Cebu City Police Office (CCPO) ang seguridad sa dakbayan nunot sa duha ka mga insidente sa pagpamomba didto sa Jolo, Sulu nga mikalas og 15 ka kinabuhi ug miangol sa daghang tawo niadtong Lunes, Agusto 24.
Si Police Colonel Josefino Ligan, direktor sa CCPO, nimando sa kapulisan nga mas higpitan ang intelligence monitoring.
Ang mga hepe sa Mambaling ug Pardo Police Stations iyang gimandoan nga makig-alayon sa Muslim leaders sa ilang hurisdiksyon aron magpatabang sa pagbantay sa ilang komunidad nga dili masudlan sa mga dautang element gikan sa Mindanao.
“(We) will be having dialogue with them spearheaded by the station commanders,” matod ni Ligan. Lakip sa iyang gimando mao ang pag-estrikto sa mga sakyanan nga moagi sa quarantine checkpoints ilabi na sa mga motorsiklo.
Awhag aniya sa publiko nga mokooperar sa kapulisan kini tungod ug alang sa kaluwasan sa tanan nga molupyo sa siyudad ug tibuok rehiyon 7.
Si Police Brigadier General Albert Ignatius Ferro. direktor sa Police Regional Office (PRO) 7, miisa na sa full alert aron pagseguro ang kaluwasan sa mga Sugboanon.
Nimando siya sa tanang city ug provincial police office directors nga bantayan ang tanang vital installations sa Central Visayas nga maoy kasagaran nga target sa mga bandidong grupo.
Hinuon, wala pay nadawat nga hulga ang PNP labot sa tinguha sa teroristang pagpangataki sa Sugbo apan wala mokompiyansa ang kapulisan. (AYB)