SA PAGSAULOG sa Agusto isip Buwan sa Pinulongan, ang mga Sugbonanong magbabalak, musikero, dramaturgo, ug disc jockey maghisgot bahin sa paggamit sa pinulongang Binisaya sa online forum nga giulohan, “Gahi og Dila, Humok og Kasingkasing” (Birtwal nga Panaghisgot kabahin sa Pinulongan sa Bisdak).
Lakip sa mga pangutana nga kumbatihon og bugno sa FB live karong Sabado, Agusto 29, alas 10 sa buntag (makaplagan saFB page sa Palm Grass The Cebu Heritage Hotel) mao ang mosunod: Gahi ba gyod lingawon ang mga Cebuano? Sayon bang ipadayag ang gugma pinaagi sa Binisaya?
Ang mga panelista mao silang Myke Obenieta (magbabalak), EMPING (musikero), Boykirat Ifm (magsisibya), ug Ingrid Vertudazo (dramaturgo sa radyo).
Ang mga moderator mao silang Adonis Durado, usa ka magbabalak, ug A. Guivelondo, usa ka heritage advocate ug representante sa Palm Grass). (PR)