(Ikaunom sa pito ka gula)
Giagpas ko si Wendell apan wa ko na gyud siya makita sa gawas. Mibalik na lang kog sulod sa sala. Gikuha ko ang puting sobre ug wa gyud ko masayop. Suwat ang sulod ani. Abli ang sobre maong akong gisusi.
Misulod koi sa akong kuwarto. Nainteres ko nga basahon ang suwat. Di man unta kini husto kay di man ako ang tag-iya sa suwat apan morag dunay nagtukmod nako nga basahon ang suwat. Miginhawa kog sagunson nga mibukhad sa pinilo nga puting papel.
Dear Wendel,
Unta tumanon mo kining akong gihangyo nimo. I know nga love nimo si Roxan, gisulti mo kini nako, di ba? Ug karon, mangayo ko nimog pabor.
Please pakigsuod kang Roixan kon wa na ko. Duna koy kanser ug tinagalan na ang akong kinabuhi.
Ibilin ko nimo si Roxan. I love her very much. Ayaw siya pasakti ug pahilaka. Mahala siya sa tibuok nimong kinabuhi.
Miginhawa ko pag-ayo samtang nagpadayon ko sa pagbasa sa suwat ni Roinilo para kang Wendell. Wa ko kapugngi ang akong mga luha. Nakahilak gyud ko.
Gibalik kog pilo ang puting papel pagkahuman kog basa ani. Gisulod ko kinig balik sa sobre. Nakapanghupaw ko. Mao diay nga nia ron si Wendell, mipauli gikan sa Manila.
Mao diay nga nakigsuod siya pag-ayo nako karon. Nakahibawo na diay siya sa sakit ni Ronilo. Apan wa man siya maghisgot sa kamatayon ni Ronilo? Maybe nakahibawo na siya bahin ani ug di siya gusto nga hisgotan pa kini diri nako kay nakahibawo man siya nga love gyud kaayo nako si Ronilo ug sakitan lang ko?
Wa koy tarong nga kinatulgan anang gabhiona. Nahasol ang akong hunahuna. Wa ko makahibawo sa angay kong buhaton. Unsaon na man lang diay ang way kamatayon kong paghigugma ni Ronilo? Apan nahunahuna ko pag-ayo ang iyang gipanugon kang Wendell.
Human kog pamahaw, miadto ko sa sementeryo. Nagdagkot ko sa lubong ni Ronilo. Nangadye ko alang sa iyang kapahulayang dayon. Unya naghilak kong nakigsulti niya.
Nagputul-putol ang akong tingog tungod sa akong pagbakho. (SUMPAYAN)