GIKASUBO sa mga personalidad sa boksing ang pagkasirado sa ALA Boxing Gym nga gikonsiderar nga mao haligi sa boksing dili lang sa Sugbo, kon dili lakip na pud sa tibuok Pilipinas.
Sulod sa 35 ka mga tuig ang ALA Boxing Gym aktibo nga mi-promote og fighters ug nitabang nga mahimong world champions sama ni kanhi four-division world champion Donnie “Ahas” Nietes, kinsa maoy longest Filipino world champion champion.
Si Jerome Calatrava, ang bise-presidente sa Omega Sports Pro International (OPSI) nga mao ang gadumala sa Omega Boxing Gym, miingon nga ilang gikaguol ang maong balita.
Matod niya nga dili lang sila ang naguol niining maong desisyon sa ALA lakip na ang tibuok boxing community sa nasod.
“Naguol gyud mi kay usa sila sa pillars sa boxing dinhi sa Cebu, dili lang sa Cebu but tibuok Pilipinas gyud,” ingon niya.
Ang ALA Boxing Gym nakamugna og kampiyon sama nila Nietes, Gerry Peñalosa, kanhi International Boxing Federation (IBF) light flyweight champion Milan Melindo, kanhi World Boxing Council (WBC) light flyweight king Rodel Mayol, WBC flyweight titlist Malcolm Tuñacao ug kanhi World Boxing Organization (WBO) minimumweight champion Merlito Sabillo.
Daghan pang mga boksidor ang nahimong kampiyon samtang anaa sila sa ALA stable.
“Daghan kaayo silang kampiyon nga nahimo ug napasikat sad nila,” sigon ni Calatrava sa nahimong legacy sa ALA stable sulod sa 35 ka tuig sa boksing.
“Naguol gyud mi kay mga amigo man tanan namo ang taga-ALA,” dugang niya.
Ang Omega Sports Pro International (OPSI) ug ALA Boxing Gym mao ang duha sa aktibong boxing promoter dinhi sa Sugbo sa wala pa mahitabo ang sports lockdown tungod sa hulga nga dala sa bag-ong coronavirus.
“Friendly competition man gyud na ang ato with ALA. Makaguol nga after pila ka dekada nga anaa sila sa tunga-tunga sa boxing scene niya karon ni hang na sila sa ilang gloves,” ingon niya.
Matod ni Calatrava usa sila sa nakurat dihang mipagawas og statement ang ALA nga mohunong na ang operasyon sa ALA Promotions ug ALA Gym.
“Nakurat mi kay sige pa gud mi og storya ni coach Edito (Villamor) tungod lage unsaon pag-resume ani nga boxing the week before na nga nahitabo,” dugang niya.
Ang tag-iya sa Gerrypens Promotions ug boxing legend nga Gerry Peñalosa nipadayag pud sa iyang pagkasubo sa pagkawala sa gym diin siya magsugod niadtong dekada 80.
Si Peñalosa mao ang orihinal nga ALA Boys niadtong dekada 80 kauban sila Villamor, Andy Tabanas, Peter Cuizon ug Rey Cosep.
“Ang ALA maoy gabuhat sa mga kampiyon og usa ko sa kampiyon nga
gikan sa ALA Boxing. Makaguol nga wala na ang ALA daghan ang nanginahanglan nila labi na ang aspiring boxers,” matod ni Peñalosa.
Si Peñalosa anaa sa ALA Gym sulod sa lima ka tuig sa dihang usa pa siya ka amateur ug bag-o lang nag pro. Niduwa siya kaniadto sa Philippine Team ug Jakarta Cup nga dala ang pangalan sa ALA.
Matod ni Peñalosa nga dako ang tabang sa ALA Boxing dili lang siya iyang karera sa boksing, lakip napud sa iyang kinabuhi gawas sa ring sama sa disiplina sa kaugalingon ug respeto sa isig ka tao.