COTABATO CITY -- Local bomb expert sa Bangsamoro Islamic Freedom Fighters (BIFF) ang giingong bomb courier nga napatay sa mga awtoridad alas 3:50 sa kaadlawon niadtong Miyerkules, Agosto 26, sa probinsiya sa Maguindanao.
Giila ang suspek nga si alyas Abu Master, sakop ni Kumander Bungos sa BIFF Bungos faction.
Kini mismo ang gikompirma ni 6th Infantry (Kampilan) Division Spokesman Lieutenant Colonel Dindong Atilano.
Una nang gipamahayag ni 602nd Brigade Commander B/General Roberto Capulong nga nakadawat sila og taho sa duha ka tawo nga sakay sa motorsiklo nga dunay dala nga improvised explosive device (IED).
Abtik nga nagpahigayon og surprisang checkpoint ang mga sundalo sa 90th Infantry (Bigkis-lahi) Battalion, Philippine Army nga gipangulohan ni Lieutenant Colonel Michael Maquilan ug AFP-Intel Operatives.
Pag-agi sa mga suspek sa military checkpoint, wala kini mihunong hinungdan nga gigukod sila sa mga sundalo.
Naabtan ang mga suspek sa mga sundalo sa Barangay Pagagawan, Datu Montawal apan nanukol resulta nga napatay si Abu Master nga angkas sa motor samtang nakaikyas ang drayber. (EEF)