DAVAO DEL NORTE -- Gipusil patay ang pulis nga unang gitahong naunay sa kaugalingong armas.
Kini mismo ang migawas nga resulta sa gihimong autopsy sa patay'ng lawas ni Pat. Mark James Villanueva nga nadestino sa Tagum City Police Station.
Sa paghinabi sa Super Balita kang Police Lieutenant Colonel Jed Clamor, hepe sa Tagum City Police Station pinaagi sa selpon, gibutyag niini nga pagkagabii sa maong adlaw migawas ang resulta sa autopsy.
Tungod niini, natuldokan na ang mga pagduda sa kamatayon sa biktima ug nasuta nga gituyo pagpatay sa wala mailhing suspek.
Gituohan nga sniper rifle ang gigamit pagpusil sa biktima kay nasuta nga layo ang gipanukaran sa bala.
Sa pagkakaron padayon ang gihimong imbestigasyon aron nga masayran ang tinuod nga motibo sa kamatayon sa pulis.
Kahinumdoman nga kalit lang natumba ang biktima, uban sa gimaneho niining motorsiklo sa may Barangay San Isidro, siyudad sa Tagum alas 7:45 sa buntag niadtong Miyerkules, Agosto 26, 2020.
Saysay sa duha niya ka mga kauban nga naglabigar sila sa Barangay San Isidro padung sa Tagum City PNP sakay sa ilang tagsa-tagsa ka motorsiklo.
Apan mihunong ang biktima ug gisusi ang giisyo kaniya nga armas kung husto ba ang kargada sa bala.
Human masusi, gibalhin niya kini sa walang kamot ug nagpadayon sa pagmaneho sa motor ug gisulayan niini pagsulod ang armas sa sakuban sa iyang bulletproof vest.
Apan kalit lang mipaka ang kusog nga buto ug maoy nakita ang biktima nga nabalintong sa kalsada uban ang gimanehong motorsiklo.
Gituohan nga naunay sa kaugalingon niyang armas ang biktima human makita nga dunay samad pinusilan sa liog nga milapos sab sa likod.
Apan sa gihimong autopsy, nasuta sa Scene of Crime Operatives nga gipusil sa tangkugo ang biktima ug ang bala milapos sa liog hinungdan sa iyang kamatayon.