USA ka magtiayong senior citizens gitukoran og temporaryo apan desenteng balay sa Mandaue City Police Office (MCPO).
Kini human makakita ang usa ka pulis sa MCPO atol sa ilang pagrekorida nila nga adunay magtiayon nga nagbarong barong lang ngadto sa Sitio Lapyahan sa Barangay Labogon, Mandaue City.
Matod ni PMaj. Mercy Villaro, ang tigpamaba sa MCPO nga nahunahunaan sa kapulisan sa MCPO nga tabangan ang magtiayon.
Giila ang magtiayon nga si Yolly Condeno, 60, ug si Gener Condeno, 72, pulos mga lumad nga taga Mandaue.
Adunay tulo ka mga anak si Yolly ug Gener apan pulos na kini nga naminyo.
Matod ni Villaro nga walay panginabuhian ang magtiayon og si Gener magsuroy suroy lang sa dakbayan ug mangpaslimos o mangayo sa ilang kasilinganan.
Ang magtiayon usa sa mga biktima sa sunog tulo ka tuig na ang milabay ug sa maong mga tuiga balhinbalhin og tukod sa ilang barongbarong hangtod nga mabalhin na sila sa ihatag nga relocation site.
Matod ni Villaro, pinaagi sa ilang proyekto nga 'Adopt a Family' nahimoan nila og temporaryong balay ang magtiayon.
Niadto, ang beneficiaries sa ilang proyekto hatagan lang nila og mga pangkonsumo o mga kinahanglanon sa balay apan karon unang higayon kini nga gitukoran na nila og panimalay.
Isip informal settler ang magtiayon, nakig-alayon ang MCPO sa barangay kabahin sa ilang proyekto.
Nag-hire sila og panday nga mangulo sa pagpanday ug gitabangan kini sa 12 ka mga pulis sa MCPO.
Sigon ni Villaro, ang gasto nila sa materyales aron pagtukod sa balay mukabat ngadto sa P18,000 ug ang kwarta nga gigahin sa royekto gikan sa daog sa MCPO nga award isip Best City Police Office sa 119th Police Service Anniversary.
Niadtong nagtukod pa sa balay ang kapulisan, ang magtiayon adto una nipuyo sa ilang kasilinganan nga andam ra sab magpatulog nila sa ilang balay.
Gisugdan pagtukod ang balay niadtong Martes, Agusto 25, ug nahuman sa Agusto 26, 2020.
Matod ni Villaro nga gipandayan sab nila og kama alang sa magtiayon.
Nahibaw-an nila nga si Yolly na-stroke ug dili na makalakaw ug nagplano ang MCPO palitan kini og wheelchair.
Nagpahigayon sab og gamay nga feeding program ang kapulisan sa maong lugar diin manghatag sila og lugaw sa mga lumulopyo.
Kining mga maayong buhat nga gibuhat sa kapulisan sa Mandaue, sigon ni Villaro nga paagi sab kini nila nga ipakita sa katawhan ug pag-awhag nga kung adunay sobra nga grasya ipaambit kini sa uban nga nanginahanglan.