DUHA ka gikatahapang mga durugista, usa kanila giingong hired killer ug suspek sa pagpatay sa usa ka pulis niadtong 2014, napatay sa managlahing police operations sa Miyerkules, Agusto 26, 2020.
Napatay sa Police Drug Enforcement Group (PDEG) 7- Special Operations Unit 5, sa Miyerkules alas 8 sa gabii ang suspek nga si Michael Bayaton, temporaryong nagpuyo sa back GMA, Barangay Busay, Dakbayan sa Sugbo.
Si Bayaton lumad nga taga Argao, habagatang Sugbo, giingong gun-for-hire.
Lakip sa operation ang Regional Intelligence Division, Regional Drug Enforcement Unit, Regional Special Operations Group ug Mabolo Police Station.
Matod ni Police Lieutenant Colonel Jovit Culaway, nangu sa operasyon, nga mo-serve unta sila og warrant of arrest kang Bayaton nga giisyu ni Judge Francis Rainier
Navarette sa Branch 26 sa 7th Judicial Region sa lungsod sa Argao sa kasong paglapas sa Republic Act (RA) 9165 kun Comprehensive Dangerous Drugs Act 0f 2002.
Ang kaso gipasaka niadtong Enero 3, 2019.
Inay mo-surrender, giingong namusil si Bayaton sa mga pulis hinungdan nga nahitabo ang engkwentro.
Gisuwayan pa pagdala si Bayaton sa ospital, apan dead on arrival.
Si Culaway niingon nga si Bayaton usa sa mga suspek sa pagpatay kang PO2 Jimmy Gorge, kinsa nakaplagang patay sa mga utlanan sa lungsod sa Dalaguete ug Badian niadtong 2014.
Ang mga personnel sa Scene of the Crime Operatives (Soco) nakapag sa balay nga gipuy-an ni Bayaton og usa ka Uzi submahine pistol, us aka kalibre .45 nga pistola ug mga bala.
Matod ni Culaway nga sa matang sa mga armas nga nakuha, klarong si Bayaton di magpadakop nga buhi.
‘PUSHER’
Napatay ang usa ka gikatahapang drug pusher sa usa ka buy bust human giingong misukol sa kapulisan alas 11:55 sa gabii sa Agusto 26, 2020 sa Barangay Cansuje, lungsod sa Argao.
Ang suspek nga dead on arrival sa ospital giilang si Sherwin Noval, 42, minyo.
Si Police Corporal Apolinar Albiso, Jr. sa Argao Police Station nga nahinabi sa Superbalita Cebu nagkanayon nga ang ilang mga kauban ug mga sakop sa Provincial Intelligence Unit sa Cebu Police Provincial Office (CPPO) mipahigayon sa joint buy- bust, apan giingong nakabantay si Noval nga pulis ang iyang gika-transact, nibunot sa iyang .38 caliber revolver ug namusil.
Way naigo sa kapulisan ug nabaslan si Noval hinungdan sa iyang kamatayon.
Nakuha sa crime scene ang usa ka .38 kalibreng rebolber nga dunay tulo ka mga bala, duha ka kabhang, P500 buy-bust money ug drugas nga 5.04 gramos nga balor og P34, 272 base sa Dangerous Drugs Board (DDB) value. / GPL