Human mapailawom sa general community quarantine (GCQ) ang Dakbayan sa Sugbo sugod niadtong Agusto 1, 2020, nahibalik usab ang pampublikong mga sakyanan.
Apan, ang naandang mga rota kaniadto sa PUJ, labina ang gagmay nga mga dan, wa pa maserbisyuhi sa bag-ong mga public utility vehicle (PUV) hinungdan nga daghan ang mga tawo nga maglakaw lang padung sa mga dan nga gisubay sa nanagan karong mga bus ug PUV.
Ang mga bus ug PUV naa ra nagsubay sa dagkong mga dan.
Tungod niini, nasabutan sa Cebu City Government ug ubang mga ahensya ang pagbutang og rota sa hilit nga mga dapit sa mga PUV.
Si Cebu City Councilor Joel Garganera, chairman sa committee on transportation sa Konseho, nipatawag og tigom uban ang Land Transportation Franchising and Regulatory Board (LTFRB) 7, Cebu City Transportation Office (CCTO) ug mga transport cooperative.
Gipadayag sa konsehal subay usab sa pamahayag sa LTFRB nga di tanang mga rota sa kanhi normal nga panahon ang nahatagan og biyahe sa mga bus o beep nga gihatagan og special permit, hilabi na sa hilit nga mga dapit.
Usa sa gisulbad sa City Government mao ang kanhi miscommunication tali sa LTFRB ug CCTO, diin adunay daghang mga driver sa bus ug beep nga gipangdakop kay wa silay identification (ID) card sa silay ID sa local traffic body .
Ang mga bus nga gi-accredit sa LTFRB V nga makapasahero gusto sa Siyudad nga motutok sa mga rota nga dagko og karsada.
Aron masiguro nga ang mga hilithilit nga lugar nga adunay rota kaniadto sa wala pa ang pandemia magahinan usab og PUV para pagsulbad sa problema sa mga sumasakay.
Gipadayag usab ni Garganera nga tabangan sa Siyudad ubos sa direktiba ni Mayor Edgardo Labella ang gagmay nga mga kooperatiba aron mapadali ang pag-release sa ilang loan sa Development Bank of the Philippines (DBP).
Hangtod karon aduna pay wa pa makakuha sa ilang gi-loan aron unta ikapalit og modernong mga PUV.
Ang tradisyonal nga PUJ di pa usab tugotan nga makadagan labi na kadtong kusog mobuga og aso niining panahon sa coronavirus pandemic.
Nipasabot si Garganera nga nag-una karong sakit sa Cebu City adunay kalambigitan sa respiratory illness.
Usa sa gitumbok nga hinungdan mao ang polusyon sa hangin gikan sa mga sakyanan.