ANG Commission on Elections (Comelec) Cebu Province miawhag sa mga aplikante o may laing transaksyon sa buhatan nga moagi una online sa di pa moadto sa ilang buhatan alang sa appointment.
Kini maoy gipahibawo ni Cebu Provincial Comelec Supervisor Lionel Castillano sa mga tigbalita.
Matod ni Castillano, gibuhat kini nila aron kalikayan ang pagkatap sa kagaw sa coronavirus disease (Covid-19).
“Ana ra jud atong mabuhat. So, mas pariority nato ang mag online, mas maayo nga mag online sila aron ma-maintain nato ang social distancing,” matod ni Castillano.
Subay sa Comelec Resolustion 10674, mahimo na nga moparehistro ang mga botante sugod sa Septiyembre 1, Martes, sa Comelec offices sa kalungsoran ug siyudad.
Apan way labot sa mga dapit nga ubos sa enhanced community quarantine (ECQ) ug modified enhanced community quarantine (MECQ).
Bisan kon ubos sa modified general community quarantine (MGCQ) ang kadaghanang mga lugar sa lalawigan sa Sugbo, anaa gihapon ang kahadlok sa Covid-19.
Hinungdan nga mihimo og lakang ang Comelec. Pasabot ni Castillano nga mahimo lang nga mo-download og forms nga naa online ang aplikante.
Kon maka register na sa form, mahimo nang maghuwat sa schedule nga ihatag sa Comelec alang sa pagpa-register sa biometrics sa buhatan.
Alang sa buot nga moduaw sa Comelec offices, gikinahanglan nga magdala og kaugalingon nga ballpen, pagsul-ob og face mask ug face shield kay kon wala, di pasudlon.
Gisubli ni Castillano nga di angay nga mabalaka tungod kay mahimo gihapon nga modawat ang buhatan og walk-in transactions alang sa mga aplikante nga way internet connection, apan first come, first serve ang basehan sa pagserbisyo.
Dugang niya mas hatagan usab og prayoridad ang mga nag submit online.
“Dili man tanan naay Facebook and internet connection. Pero priority namo ang online appointment. Ang Comelec nag reduce og capacity sa atong pagpangrehistro kay inig 3pm to 5pm, i-disinfect man na ang office. Ang office nato Tuesday to Saturday kay para maka cater mi sa Sabado kay dili man mo allow ang COA og overtime. Mao nang 8 am to 3 pm nalang ta,” matod ni Castillano.
Taas pa og kahigayonan ang mga Sugboanon sa probinsya nga makaparehistro alang sa sunod eleksyon tungod kay molanat pa ang voters registration kutob sa sunod tuig.
Ang registration una nga gi suspenso sa Marso 9, 2020 kutob Agusto 31 gumikan sa hulga sa Covid-19.
Sa kinatibuk-an, dunay 2 milyunes ka rehistradong mga botante ang lalawigan sa Sugbo.
Gilauman sa Comelec nga posibleng menos pa lang ang moparehistro kay gidid-an pa sa paggawas ang mga batan-on nga nag -dad 21 paubos ug senior citizens. (ANV)