MO-ALEGRE na og balik ang Roxas Night Market human nga naundang sayo ning tuiga gumikan sa coronavirus disease (Covid-19) pandemic.

Kini human nga gipahibawo ni Mayor Sara Duterte-Carpio kagahapon, Byernes, Agosto 28, nga ablihan na ang night market sa ikatulong semana sunod bulan, Septyembre 2020.

Apan giklaro sa mayor, kinsa nahinabi sa 87.5 FM dcDR, nga kutob lang una sa 25 percent ang pasudlon sa lugar isip pagtamod sa ipatuman nga health protocols sa dapit.

Mga vendors nga molangkob sa food, dry ug massage sections sa market bahinon sab "by rotation" nga di molapas sa duha ka semana. Human sa unang rotation, mosunod ang laing hugna sa mga vendors nga maoy mohikyad sa ilang mga baligya sa lugar.

Hinuon, gitin-aw ni Duterte-Carpio nga di pa niya mahisgutan ang ipatuman nga mga guidelines gumikan kay padayon pa nila kining gihapsay ug gihisgutan sa pagkakaron.

Kung mabuksan na ang night market, padayon nga susihon kung mitamod ba ang mga tawo sa mga protocols sama sa pagsul-ob og face mask, social distancing ug ang pagpanghugas sa mga kamot.

Ang pag-usad sa market mag-agad matud pa sa lihok sa mga tawo ilabi na sa ipatuman unya nga mga guidelines atol sa inisyal nga pagbukas sa night market.

Sa pikas bahin, gipahibawo sab sa mayor nga di mahinayon sunod bulan ang pagwagtang sa liquor ban sa dakbayan sa Davao.

Gitin-aw niini nga posibleng malibkas ang liquor ban sa bulan na sa Oktubre, ilabi na nga ang siyudad sa Davao padayon nga ipailawom sa modified general community quarantine gikan September 1 hangtud Septeember 30 base sa nakuhang inisyal nga impormasyon sa mayor.