Sugod gahapon wa nay TV Patrol Central Visayas ug wa na say Teleradyo sa ABS CBN. Mao sab ni ang nahitabo sa maong mga programa sa ABS CBN sa ubang probinsiya.
Pagkasakit palandungon alang sa mga tawo nga nagtrabaho ug sa mga Kapamilya nga nagsunod kanunay sa mga programa ubos sa payong sa regional network group sa Kapanilya Network.
Balik-lantaw nalang ta sa mabulokon nga kagahapon. Di ba hilabihan man ka puno sa aksyon ug ka mabulokon ang ABS CBN gikan kaniadto hangtod karon kung serbisyo publiko ang hisgutan. Di hinuon uyon ang uban.
Pero sa akong bahin, ako nipili sa pagka mediaman pamasin nga sa ginagmay nga paagi maserbisyohan nako ang mga nanginahanglan. Nagsugod ko sa duha ka sibyaanan sa radyo.
Usa sa dakbayan sa Sugbo ang Bombo Radyo ug ang ika duha ang DYSB sa Mandaue City. Human nga niboluntaryo pagpanira ang DYSB tungod sa pinansiyal nga hinungdan ug ang grabing epikto sa bagyong Ruping nawad-an ko og trabaho.
Mao nga nanimpad ko sa kalibutan sa pamoksing isip lisensiyado nga ring announcer. Hangtod nga may nagsulti nako nga nanginahanglan ang ABS CBN og segment producer sa Lingkod Bayan pinaagi sa TV Patrol.
Salamat nila ni Ma’am Sonia Hidalgo ang Station Manager niadtong panahona ug Ms. Tata Cinco Sy, nadawat ko sa maong trabaho.
Dinhi nagsugod ang daghang gimbuhaton nga akong gipas-an. News Reporter, Anchor sa News mabuntag, Hoy Gising ug Lingkod Bayan program matag Sabado sa hapon.
Producer sa Sunday Knockout usa ka boxing special kausa matag semana ug ring commentator sa samang higayon.
Sa pagka news reporter di maihap ang mga kulba hinam nga coverage nga ako nag-cover nga naglakip sa police operation ug ang coverage sa military operation sa ilang anti-insurgency campaign diha sa amihanang Sugbo.
Hinuon, gamay ra ni itandi sa akong assignment isip reporter sa Sky Patrol tungod sa daghang pagsulay nga akong naagian.
Isip reporter wa damha naahat ko pag-apil sa shooting sa teleserye nga Quizon Avenue uban ni King of Comedy nga si Dolphy. Reporter ang akong papel sud sa duha ka episode diin si Dolphy mismo ang akong gika-dialogue atol sa shooting sa usa ka resort sa Lapulapu City. Grabing kulba ang akong gibati sa talagsaong higayon.
Kinsay makalimot sa nitaliwan nga si Ricardo Cardinal Vidal. Sa iyang pagdumala sa Cebu Archdiocesan Mass Media Awards kun CCMA.
Niadtong dekada 90 nakadawat ta og pasidungog isip finalist sa category sa pagka Newscaster. Di gyud nako ni malimtan.
Sama nga di gyud nako makalimtan ang akong kinabuhi uban sa ABS-CBN sud sa 28 ka tuig kapin.