Funding agencies ang Philhealth, Department of Health (DOH), Philippine Charity Sweepstakes Office (PCSO), ug Department of Social Welfare and Development (DSWD) sa Malasakit Centers (RA 11463) sa mga publikong tambalanan.
Ang Philhealth duna sab libreng serbisyong medical ubos sa Universal Health Care (RA 11223). Sa publikong ospital 90 porsiyento libre, 10 porsiyento ray pabayran. Sa publikong specialty health facilities 70 porsiyento libre, 10 porsiyento pabayran. Sa pribadong ospital 10 porsiyento libre, 90 porsiyento paninglan og bayad.
Nagsugod ang kontrobersiya sa Philhealth sa dihang mga kadagkoan nagdawat og self-declared bonus nga P1.448 bilyunes panahon ni Pres. Noynoy Aquino. Sa 2017 alkansi og P4.75 bilyunes, sumala sa COA.
Gitaktak si Philhealth Chief Ma. Jude dela Serna sa gastosong biyahe. Gipalagpot ang Philhealth board members sa anomalosong pagwaldas sa binilyong kwarta sa peke nga mga pasyente ug minao-mao nga serbisyong medikal. Mipalusot sa bayranan sa mga pasyente tali sa mga ospital ug Welmed Dialysis Center. Corruption scandal nga P153 bilyunes ang nahanaw sa inefficiencies, overpayments ug ghost claims.
Lain ang utang sa Philhealth nga P2.5 bilyunes sa 600 ka mga sakop sa Private Hospitals Association. Gipapahawa si Philhealth Chief Roy Ferrer. Sila Ferrer ug kanhi board Roberto Salvador mibutyag sa tikas peligro mopadulong sa pagkabangkarota. Milambigit sa regional vice-presidents nga gihulagwayng Philhealth mafia sila si Paulo Perez, Dennis Adre, Khalqussaman Macabato, Vallerie Anne Hullero, Masiding Alonto Jr., Jelbert Galicto, William Chavez ug Meriam Grace Pamonag.
Si Atty. Thorrsson Keith nga miluwat isip anti-fraud legal officer mibonggo nga gisugo siya ni Philhealth Chief Ricardo Morales nga ipaduol si Presidential Anti-Corruption Commissioner Greco Beljica aron mahilot ang overpriced Covid-19 benefit package ug test kits. Misunod pagluwat si Vice-Pres. Augustus de Villa. Kanhi board Alejandro Cabading misaksi batok Morales ug kaubanan nga gikawkaw ang 15B pesos ug gipaburot ang presyo sa IT Systems nga 1.2B pesos.
Utangan pa gyod og P800 milyunes sa PNRC ang Philhealth. Sakop sa execom nga laing mafia Renato Limsiaco Jr., Rodulfo del Rosario, Dennis Mas, Jojo Mangaoang ug gitumbok nga godfather si Sec. Francisco Duque isip Chairman sa Interim Reimbursement Mechanism. Sila Keith, Cabading ug kanhi aide Etrobal Laborte nga misaksi gihatagan og legislative immunity. Lakip nga gipaatubang ang mga ospital nga dunay kasong fraud.