Way perpektong relasyon kay tanan, ma magti-ayon o uyab, makasinati man og lain-laing mga pagsuway lakip mga problema, apil kalipay og kasakit. Apan duna kini alibyo nga kon perming bansay-bansayon, makapalahutay sa relasyon.
Ang pakig-relasyon di sa tanang panahon happy ang ending sama sa salida sa Disney.
Akong ipa-ambit ang mga leksyon nga akong nabasa gikan sa ‘Fearless Soul’ kay para nako dako kini og matabang pagpalig-on sa relasyon.
Hinumdumi nga ang pagpangita og pares tinuyoan og dili aksidenti. Ikaw dunay gahom ug katungod sa pagpili sa imong gustong maka-uban hangtod sa katiguwangon busa ayaw pagdali-dali og pangita labi na kung ikaw magul-anon, nag-inusara o napugos lang tungod sa pressure sa barkada kay seguradong di kini magdugay.
Desisyoni pag-ayo ang kalidad sa imong gustong ma pares kay sa panahon nga di mo magkasinabot, imo kining mabalikan nganong siya imong gipili.
Expectation kills matod pa sa akong amigo nga psycho-therapist maong di maayo nga magsegi og asa ug laom sa pares kay kung di matuman imong gihandom mahi-ubos o masuko na hinuon nga mopaingon sa bungol. Ayaw pagdahom nga ang imong parehas makabasa sa imong huna-huna o gibati kay di ma ni sila mananag-an.
Be kind. Kung tinu-oray ka nga nahigugma hatagi og respito ang imong pares. Ayaw syagiti, hulga-a o balikasa kay lisod na ibalik ang mga sakit ug bastos nga pulong kung makagawas na sa baba.
Importante sab kining Communication. Ayaw ka-uwaw o ka-ikog pagpadayag sa imong tinu-oray nga gibati, panginahanglan og kahadlok kay makatabang man kini pagpalambo sa inyong relasyon. Mahuwasan sab ka sa imong gibati bisag unsa pa kini ka sakit o ka lisod.
Hatagi sab og space ang usag-usa. Mas maayong hatagan og panahon ang atong kaugalingon ug mga pares nga makahimo sa ila ug atong gustong pagabuhaton sama sa pagkuyog sa higala panagsa . Ayaw pagsegi og kuyog-baboy kay mura na hinuon kini’g hinigtan nga natuok kay di na ka ginhawa og way kagawasan.