Center island garden sa Brgy. Ibabao-Estancia



UTANON SA CENTER ISLAND: Mao kini ang mga utanon sa center island sa dala sa Ibabao-Estancia, dakbayan sa Mandaue. / Kate F. Denolang
UTANON SA CENTER ISLAND: Mao kini ang mga utanon sa center island sa dala sa Ibabao-Estancia, dakbayan sa Mandaue. / Kate F. Denolang

GIPASIUGDAHAN sa kapitan sa Barangay Ibabao-Estancia, Mandaue City ang paggamit sa center island sa may dan G. Ouano Ext. nga tanuman og mga utanon.

Matod ni Romulo Echavez Jr., ang kapitan sa Barangay Ibabao-Estancia, bisan paman nga wala pa gipatuman ang mga community quarantine nagtanom na sila og mga utanon sa ilang center island.

Nagsugod sila sa pagtanom human nga nasunog ang kabalayan sa may dan G. Ouano Ext. niadtong Pebrero 29, 2020.

Nakita ni Echavez nga mas maayo nga utanon ang itanom niini kaysa sa mga buwak nga walay makapanghimulos.

Pag-abot sa mga community quarantine nga gipatuman sa siyudad, mas nakita ni Echavez nga mao kini ang labing gikinahanglan sa iyang mga konstituwente.

Bisan paman nga puro de lata ang kinaon sa mga tawo pinaagi sa pagsagol ug utanon gikan sa center island mas mahimsog ang iyang mga konstituwente.

Matag center island adunay usa ka sitio ang assign nga muatiman sa maong mga utanon ug inubanan sa ilang mga kawani sa barangay mao sab ang mu-gam sa maong mga tanom.

Ang mga tanom nga anaa sa ilang center island mao ang kamunggay, tangad, talong, kamatis, alugbati, kangkong, gay, pechay ug uban pa.

Matod ni Echavez nga ang mga bunga libre lang nila ihatag ngadto sa katawhan ug ang hangyo lang nila nga mananghid sa barangay aron makaabag ang ilang kawani sa pagkuha.

Dili sab siya musugot nga ang gipangayo nga bunga ipabaligya ngadto sa uban.

Kini tungod, adunay uban nga mokuha og laroton lang ang mga bunga nga mamahimong makadaot sab sa tanom.

Matod ni Echavez, halos tanan na nga residente sa Barangay Ibabao-Estancia ang nakapanghimos niini ug sagad sa ilang pangayuon mga kamunggay ug tangad.

Aduna sab taga laing barangay nga maagi sa ilang center island ug mangayo nila og bunga, sigon ni Echavez nga muhatag lang gihapon sila bisan dili residente sa Ibabao basta mananghid lang.

Dili ra sab mabalaka si Echavez kung adunay manguha sa ilang mga utanon o manghilabot sa mga utanon tungod ang mga residente duol sa maong center island mubadlong sab sa mga wala mananghid.

Sa pagbisita sa Superbalita Cebu sa center island, nga nahiluna lang sa dan atubangan sa barangay hall, nakita niini nga nilabong na ang mga tanom ug makita nga maayo kini nga pagkagam.

Ang ilang mga kamunggay tag-as na ug, sigon ni Echevez, pagaputlan kini nila ug ihatag labi na og motaas na kini.

Nagplano si Echavez nga palapdan nila ang maong proyekto ug gamiton unya nila ang center island sa habig sa ilanga barangay sa dan A.C. Cortes Ave.

Apan sigon niya nga mananghid pa siya ni Mandaue City Mayor Jonas Cortes.

Nagpano sab siya nga aron dili nalang sab magsalig ang iyang mga konstituwente sa ilang makuha nga bunga sa mga center island, hatagan sab niya og lain laing tanom kada balay aron sila ang mugam.

Kung kini mamunga na, mamahimo nga mangayo ang isig ka silingan sa ilang mga bunga.

Apan sa pagkakaron nagpaabot pa siya sa mihatag og interes nga mu-donar og depektado na nga mga galloon nga himoong kaang sa mga tanom. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph