Binasi sa Jeremias 20:7-9; Salmo 63; Taga-Roma 12:1-2; Mateo 16:21-27
MAY kaila ba kamo nga mga tawo nga nag-agi gyod og kalisod sa kinabuhi? Nga nakigharong gyod sa daghang kalisdanan, hagit, ug limitasyon unya milambo tungod sa makasingot ug malahutayon nga pagpaningkamot? Apan human nila kini maagii ug ming-asenso, ila pong ilikay ang ilang mga anak sa tanang matang sa kalisdanan kay, lagi, lisod man ang ilang giagian.
Kaalaot sa mga anak kay magdako sila nga walay klarong tumong ug wala makaagi og kasinatian nga moumol unta sa ilang kinaiya, hiyas, ug batasan. Nalingla ang maong mga ginikanan sa dili makatarunganon nga gugma alang sa ilang mga anak. Makaluluoy ang mga anak.
“Pahawa Satanas!” miingon si Jesus kang Pedro sa dihang kini misupak sa nahisgotang plano sa Dios diin paantuson ug patyon si Jesus sa kadagkoan sa mga Judio. Kon subayon ang papel ni Satanas sa bibliya makaingon kita nga kanunay siyang mobabag sa plano sa Dios. Gitental, pananglit, niya si Jesus didto sa kamingawan pinaagi sa mga maanindot nga butang nga mahimo gyong himuon ni Jesus apan wala mosubay sa plano sa Dios sa iyang kinabuhi.
“Babag ikaw kanako, kay wala ka maghunahuna sa iya sa Dios kondili sa iya sa tawo”, mipadayon si Jesus. Wala sa lugar ang gugma ni Pedro kay dili gibabagan niya ang plano sa Dios. Kon misugot pa si Jesus sa laraw ni Pedro, dili unta kita maluwas pinaagi sa hingpit nga gugma nga gipadayag didto sa pagbitay ug pagkamatay ni Jesus sa krus. Tawhanon ra unta nga paagi sa pagpangluwas. Ug dili pa kini makaluwas.
Usahay makalibog gyod ang plano sa Dios. Gani miingon si propeta Isaias: “Ginoo, gilimbongan mo ako”. Unsaon ta man god nga sa dihang mipropesiya si Jeremias, ang iyang nadawat pagbiaybiay ug kahadlok. Miabot gyod siya sa yugto diin buot niya nga hikalimtan ang Ginoo ug magpakahilom na lang siya. Apan kon mohilom siya, ang pulong sa Dios “daw kalayo nga nagdilaab...sa akong kasingkasing ug kabukogan. Naluy akog pinugong niini, ug dili ko na gayod kini kapugngan”. Dili gyod diay kapugngan ang plano sa Dios bisag lisod kining sabton.
Sa atong bahin, isip mga binunyagan, mapakita nato nga andam kitang mobuhat sa kabubut-on sa Dios bisag lisod kini. Ang unang mabuhat nato mao ang “pagtugyan sa inyong kaugalingon ngadto sa Dios, ingon nga buhing halad, balaan ug makapahimuot kaniya”. Kining pagtugyan sa kaugalingon pagbag-o “sa Dios ang inyong panghunahuna”. Niining paagiha masayran nato ang kabubut-on sa Dios – unsay maayo, hingpit, ug makapahimuot kaniya”.
Ang gugma diay nga anaa sa lugar magsugod sa kabubut-on sa Dios ug andam nga bag-ohon ang hunahuna. Mahimo sad nga kon sundon nato ang Dios, aduna say mangdaot ug magbiaybiay nato. Apan basta lang nga anaa sa lugar ang atong gugma, dili ta angay mohunong sa atong pagsaksi sa atong pagtuo. Dili nato likayan ang kalisdanan apan idugtong kini sa pag-antos nga giagian ni Jesus.
Anaa ba sa lugar ang atong gugma?