IPAUBOS sa swab test ang tanan nga drivers sa cargo trucks sa lungsod sa Medellin nga gikan sa dakbayan sa Sugbo, matod sa bag-ong kamandoan nga giluwatan ni Medellin Mayor Benjun Mondigo sa Agusto 27, 2020.
Matod sa mayor nga importante nga masiguro nga way gidala nga kagaw sa coronavirus disease (Covid-19) ang mga driver kon mopauli na sa lungsod.
“So what we did karon, among gihangyo ang mga driver nga i-swab gyud sila para ma-determine nato nga wala silay nadala,” matod ni Mondigo sa Agusto 27.
Gipasabot ni Mondigo nga tungod kay sagad sa panginabuhian sa mga konstituente mao ang pagpangisda, daghan ang moangkat og supply gikan sa mga barangay nga duol sa dagat diin presko pa ang makuha niini.
Kini sama sa Barangay Mahawak ug Kawit nga sa obserbasyon sa mayor, di kalikayan ang pagdagsa sa mga tawo.
“Kadtong sigi og biyahe among gihangyo, especially kay diri sa area among gitan-aw daghan man gud naigo ang area nga katong fishing area like Mahawak ug Kawit, anha modunggo ang mga isda, so dalhon na didto sa Cebu. Unya dili lang na diha. Naa sad gikan sa Bantayan Island. Usahay naa pay sa Masbate mao na nga grabe ilang exposure,” matod ni Mondigo.
Nakighinabi na si Mondigo sa kapulisan ug mga doktor sa lungsod alang sa maong lakang tungod kay gilaraw nga ipatuman na sa Lunes, Agusto 31.
“Actually, giadto na nako ang doctor ug ang police nga mag-conduct nata og swab...kay didto sa atong checkpoint, tan-awon na sila sa police. We are concerned ani nga mga area kay more than half sa total cases sa mga nanga positive diha gyud naigo,” dugang ni Mondigo.
Gawas sa maong lakang, gibutyag ni Mondigo nga magpadayon ang pagpasira sa publiko sa interior nga mga agianan sa duha ka mga barangay sa lungsod tungod sa nagkataas nga mga kaso sa Covid-19 sa lugar.
Base sa uwahing datos sa Agusto 26, niabot na sa 60 ang kompirmadong kaso sa Covid-19, pito ang aktibo, 52 na ang naka-recover ug usa ang namatay. (ANV)