LAWAS sa usa ka lalake nakit-an naglutawlutaw niadtong Biyernes, Agusto 28, 2020 sa kadagatan sa Ouano Wharf, Barangay Looc, Mandaue City.
Matod ni Police Staff Master Sergeant Anaclito Lluronilla, desk officer sa Opao Police Station, nga nakadawat sila og taho gikan sa usa ka informant nga anaa sa lugar nga adunay lawas sa tawo nga nalutaw-lutaw.
Niresponde sa lugar ang mga kawani sa City Disaster Risk Reduction and Management Office (CDRRMO) ug gikuha dayon ang lawas sa dagat.
Dali kining gidala ngadto sa Mandaue City Hospital.
Matod ni Lluronilla nga ang maong lalake gibana bana nga nagpangedaron og 40 anyos.
Nagsul-ob kini og blue nga t-shirt ug yellow nga basketball shorts.
Sa pakighinabi sa Superbalita Cebu kang Lluronilla sa Sabado, Agusto 29, 2020, wa pa mailhi ang maong lalake.
Wa pay mipakita nga kabanay niila sa lawas.
Matod ni Lluronilla nga wa sab silay nadawat nga taho nga adunay milukso sa bisan asa sa duha ka Mactan bridges sa mga miaging adlaw.
Kadaghanan sa mga patay nga lawas nga nakaplagan sa Mactan Channel mga tawo nga naghikog pinaagi sa pag-ambak sa taytayan.
Apan tungod sa sunodsunod nga mga kaso sa paghikog sa duha ka Mactan bridges sa miaging tuig, gipabantayan na kini og mga pulis sa Mandaue City ug Lapu-Lapu.
Sukad gibutangan og mga pulis, duna nay nasanta nga mga tawo nga ningsuway sa pag-ambak sa taytayan, apan nasanta.
Ang pagbantay gihimo lang panahon sa kagabhion, apan dunay mga tawo nga naghikog panahon sa adlawan.