NALINGAW sa pagpangaon sa spaghetti ang walo ka mga bata nga hinatag sa ilang silingan apan human sa pipila ka gutlo, ang mga bata gipangdala sa tambalanan gumikan sa ilang pagsukasuka, pagsakit sa ilang tiyan ug nangalipong kagahapon sa buntag, Agusto 30, sa Barangay Bulacao, siyudad sa Sugbo.
Si Bulacao Barangay Captain Rodrigo Jabellana nga nahinabi sa Superbalita Cebu nagkanayon nga unang gidala sa barangay hall sa ilang mga ginikanan ang unom ka mga bata.
Apan paglabay sa tunga sa oras, laing duha na usab ka mga bata ang gidala tungod sa samang rason sa barangay.
Ang mga bata nagpangidaron og 8, 7, 5, 6 ug 4 nga gidudahang nalanag human ningkaon sa spaghetti nga hinatag sa silingan nianang buntag sa Dominggo.
Ang spaghetti salin sa salosalo sa adlaw nga natawhan niadtong Sabado, Agusto 29.
Sa record sa barangay nga gihatag sa inahan nga si Anita Gardaban, kinsa ang tulo ka mga anak niini nga nagpangidaron og 8,7, ug 4 anyos, ang apil sa nalanag human nikaon sa bahawng spaghetti.
Dugang ni Jabellana nga pangangkon sa mga inahan sa mga bata nga ang spaghetti nga gihatag sa usa ka babayeng silingan nga maoy nakaon sa mga bata.
Nakurat ang mga inahan sa ilang nakita sa ilang mga anak hinungdan nga dali nga nangayo og tabang sa barangay aron madala ang ilang mga anak sa tambalanan.
Si Jabellana nimando na sa iyang mga sakop nga adtuon ang maong tawo nga naghatag sa spaghetti aron ipatawag sa barangay.
Atol ning pagsuwat, ang mga bata pulos naluwas na.