USA sa gisaad ni Presidente Rodrigo Duterte sa dihang midagan siya sa pagka-presidente niadtong 2016, mao ang kausaban sa sistema sa atong gobyerno gikan niiing sistemang presidensyal ngadto sa Federal sama sa ubang mga nasud sa Europa ug sa America.
Kung pakyas man ang atong presidente sa pagsumpo sa droga ug kurapsyon, mas maayo nalang nga iyang matuman ang pagbag-o sa atong sistema nga sentralidong gobyerno ngadto sa federal sa tumong nga mas dali ang kalamboan sa atong nasud.
Apan atong nakita nga tungason ug lisud nga iyang matuman kung ipaagi sa legal nga proseso, bisan sa tulo ka paagi nga mao ang Constitutional Covention (CONCON), Constitutional Assembly (CON-AS) ug Peoples Initiative.
Sa dali nga paagi, mao ang pagdeklara og revolutionary government nga dili sundon ang legal nga proseso ug dili na sundon ang atong kasamtangang batakang balaod, aron dali ang pagmugna og laing batakang balaod nga mao ang federal nga sistema.
Pero ang nakaapan lang, tungod kay illegal ug dili pinasubay sa legal nga proseso. Unang hinungdan, tungod kay atong nakita nga dili gyud gusto ang atong mga magbabalaod sa Congress ug Senado, Ikaduha, mubo nalang kaayo ang panahon, duha nalang ka tuig matapos na ang termino sa atong presidente.
Mga supporter sa atong presidente ang nagduso sa rebulosyonaryong gobyerno, nagtuo kita nga nga wala sila rendahi sa Malakanyang nga iduso ang illegal nga pamaagi tungod kay nasayud ang Malakanyang nga illegal kini, ug ang dugang gisinggit sa mga revolutionary movement nga magpabilin gihapon ang atong presidente nga maoy motimon ubos sa bag-ong sistema.
Pero dako ang atong pagtuo dili kana maoy gustong mahitabo sa atong presidente tungod kay nakita naman gyud nato nga luya ang iyang lawas ug aduna na siya’y sakit.
Mismo siya maoy nagbutyag niana, gawas lang tingali, kung adunay laing agenda nga kinahanglan matuman? Ug kini siya nga maoy preparasyon para sa atong mayor sa Dakbayan sa Davao nga gusto nato nga maoy mosunod nga presidente sa atong nasud.
Ang rebulosyunaryong kalihukan aron gub-on ang atong batakang balaod, sa usa ka illegal nga kalihukan, apan, bisan kung illegal kini, kung suportado sobra sa katunga sa atong populasyon kung majority sa katawhang Pilipino, ang illegal mahimong legal.
May panultihon nga “The voice of the People is the voice of God” kung dili makuha sa legal nga paagi, kuhaon pinaagi sa pagpakigbisog ug kana mao ang rebulosyonaryong kalihukan sama sa People’s Power.
Pero nia dinhi ang dakong pangutana? Makaangkon kaha og makabungog nga suporta kining nagduso sa revolutionary government movement karong panahona? Aron atong matuman nga magpabilin ang atong presidente sa iyang posisyon sa pag-usab sa atong bag-ong Constitution?
Rebulosyonaryong gobyerno temporaryo lang, hangtud nga mahuman ang gitinguna nga bag-ong sistema ang federal. Magmalampuson kaha sila? Atong atangan ang sunod nga mga panghitabo.